留家抗疫最好嘅節目當然係煲劇，而煲劇最好嘅良伴，當然係零食！雖然近排因疫情關係，餐飲、玩樂都冇乜動靜，但其實零食界就不斷有新品推出，貼心嘅CONY已為大家綜合咗各路資訊，方便大家入貨再慢慢煲劇。
口立濕＋Gelato＝本土驚喜
夏日熱辣辣，雪櫃當然要有雪糕儲備，以便隨時消暑！今次為大家介紹嘅雪糕唔係大牌子，而係由本土品牌「阿嫲食譜Ah Ma Recipe」推出嘅本土味雪糕。曾為五星酒店總廚嘅主理人以Gelato作基底，再加入阿嫲最愛嘅「口立濕」（即涼果），研發出「話梅士多啤梨味」、「陳皮伯爵茶味」，仲有「花生糖花生醬味」及「薑汁撞奶味」，口味獨特，而且聲稱係無添加香料、色素嘅手工雪糕。
CONY最初聽見幾隻味都心諗「係真唔係呀？」點知食落味道相當有驚喜，各款口味都食得出原材料的真實味道。原來今次口味研發經過53次調配先誕生，而且工序繁複，例如要將花生低溫慢烤3小時以上，以防止出現油膱味，又將伯爵茶以冷壓沖泡，先可以造出茶味濃郁而口感幼滑嘅雪糕。可惜雪糕暫時只在太古城的pop-up store有售，如果有更多銷售點就好啦！
▲話梅士多啤梨味將話梅的香甜與士多啤梨的酸完美融合；花生糖花生醬味有真花生糖，香甜又有脆口；陳皮伯爵茶味唔係好食得出陳皮味，但伯爵茶味濃郁；薑汁撞奶味嘅薑味濃但唔嗆喉，口感幼滑如撞奶。
阿嫲食譜Pop up Store
日期：即日至9月30日
地址：太古城中心誠品書店一樓
電話：5112 2560
一開即飲 樽裝雞尾酒
港人工作壓力大，閒時去酒吧飲返兩杯放鬆係等閒事，但係疫情期間難以在外享受美酒，尤其係需要專人調配嘅雞尾酒，想飲真係唔容易。而全新本土品牌「Píng」就推出樽裝雞尾酒，方便一開即飲，唔使成日喺屋企都係飲啤酒咁單調。如果你係同另一半煲劇嘅話，仲可以將樽裝雞尾酒倒出來加點裝飾，即刻情調Up！
現時樽裝雞尾酒共有6款口味，均由「2018年 Monkey Shoulder調酒師大賽」冠軍、專業調酒師Sonic Chan，根據香港年輕人口味調製，不但比較易入口，而且味道清爽為主，雞尾酒嘅顏色、設計、包裝都符合打卡潮流，就算要煲劇，CONY都忍唔住要「相機飲先」！
▲01 Sakura Dream：將八重櫻以清酒和洋甘菊冷萃24小時，再加入梅酒及柚子酒混合而成，容易入口又不太甜。
02 Berries Garden：用上藍莓、氈酒、紫蘇葉和薰衣草，隱約帶點山楂味道。
03 Golden Galaxy：混合冧酒、佛手柑、檸檬、橙和利口酒，帶著濃烈的熱帶風情柑橘味道。
04 Smoked Negroni：用上苦艾酒、氈酒和苦酒，再以巴西咖啡豆煙薰用來稀釋的水，入口充滿著濃濃的煙薰味。
05 Pilo Milo：將美祿、麥芽威士忌、煉奶及黑巧克力香甜酒混合而成，靈感來自美祿恐龍。
06 Lemon Tart：以榛子醬、白蘭地蛋酒、新鮮檸檬汁及檸檬酒調製而成，不但有檸檬味，仲有餅底的香甜！
Píng樽裝雞尾酒
網址：https://www.ping852.com/
備註：購買滿$400免費送貨
一次過食幾條 異國風味的百力滋
唔知大家去旅行會唔會好似CONY咁，去親日本同泰國都會掃當地獨有嘅百力滋返香港？近排冇得去旅行，CONY呢個癮抑壓咗好耐，而最近百力滋喺香港竟然都出新口味，充滿泰國風情嘅「冬蔭功味」，以及令人聯想起蒙古大漠風光嘅「孜然味」。今次仲有全新超幼細設計，等你可以一次過食幾條，過足口癮！
▲「冬蔭功味超幼百力滋」由傳統冬蔭功湯配方改良製造，獨特香料帶出酸辣口味；「孜然味超幼百力滋」嘅孜然味唔算好重口味，有淡淡蒙古串燒風味。
銷售點：各大超級市場及便利店
「泰」滋味爆谷食唔停口
講到煲劇、睇戲必備嘅零食，又點少得爆谷？一向積極研發不同創新口味爆谷嘅「星球工坊」最近又有新作，為食慾不振嘅夏天而設嘅「泰式酸辣爆谷」，選用泰國檸檬草、香茅及多種香辛料調製而成嘅酸辣粉，將冬蔭功風味呈現出來，集酸、辣、鹹、香於一身，務求令你食唔停口！
▲泰式酸辣爆谷味道好有層次，先係檸檬草香，再來酸辣味衝擊，最後有一絲絲甜味，教人食唔停口！
銷售點：Magi Planet 星球工坊門市及官方網站
零罪惡感Tiramisu與排毒蔬果冰沙
零食、甜品好多時都同「邪惡」二字掛勾，而韓國健康食品品牌Dashin就推出咗「豆腐Tiramisu」，以全豆腐（即製造過程中冇丟棄豆渣嘅豆腐）混合忌廉芝士調配而成嘅豆腐忌廉，以及滲透咖啡嘅全麥麵粉餅底製作而成，因此卡路里、脂肪及糖含量都比一般Tiramisu低，就算煲煲下劇想食甜品，都冇咁有罪惡感！
另一邊廂，品牌又推出多款排毒沙冰，以原材料直接研磨而成，冇額外加糖份，所以膳食纖維豐富又唔會太甜，仲有助排毒。現時共有7款口味，每款都用上4至6種蔬果，再加入果仁或燕麥打成，例如青色口味就有牛油果、羽衣甘藍、蘋果、香蕉、山藥及杏仁，因此都幾有飽足感。
銷售點：HKTVmall
養生桂花梨米水 潤肺生津
有時煲劇煲到三更半夜，又或者食零食多得滯，容易熱氣導致喉嚨乾渴，惹來中招疑雲嚇親自己點算好？近日本地米水品牌CheckCheckCin同香港電車聯乘，推出限量版紙包裝「桂花梨米水」。原來雖然天氣炎熱，但已經立秋，需要滋陰潤燥，而梨可以潤肺生津，桂花則可以減壓解鬱。間唔中煲住劇飲下，就唔怕會有咩誤會發生啦！
▲淡淡雪梨甜味與陣陣桂花香，感覺清爽。
銷售點：香港電車官方網站、CheckCheckCin門店、Green Common、Ztore、HKTVmall
