疫境開工不足要自強！MIRROR、ERROR成員創自家潮牌

組合MIRROR及ERROR自出道以來吸納大批粉絲，當中Ian及Tiger@MIRROR、193及保錡@ERROR忙於發展演藝事業外，更創立自家時裝品牌做老闆，在疫情下另覓出路。

Ian早前忙於拍攝ViuTV電視劇《男排女將》，同時又要準備即將推出的新歌〈鯨落〉，但他仍抽空創立自家時裝品牌iNDIPANDANT。「呢排因為疫情關係多咗喺屋企，同時亦多咗時間了解自己，發現由細到大都好鍾意時裝，以前中學冇乜零用錢，為咗搵外快，就喺日本網站bid啲潮流品牌服飾返嚟再賣出去，嗰陣好興日牌，所以都賺到啲外快。」年少時的經驗令Ian靈機一觸，決定創立iNDIPANDANT，所有產品均是由Ian親自設計。「我推出的產品都由好多拼布，再結合唔同嘅嘢變做一件item。每塊布每件產品都係獨一無二，但將好多件獨一無二嘅產品放埋一齊，就會得到更加獨一無二嘅靚，成為令人值得欣賞嘅地方，品牌名字iNDIPANDANT嘅由來，就係想帶出呢種美。」

品牌於昨日（7月23日）正式推出，在第三波疫情下開網店，Ian未有擔心過：「疫市開網店反而仲好，大家唔敢出街留喺屋企，反而多咗上網，喺網店購物意欲仲高，因為足不出戶就已經有貨可以送到屋企。」現階段Ian計劃將商品逐件推出，等大家慢慢欣賞每件產品的細緻設計 。

相比起Ian，Tiger創立自家品牌Dézert是受到家人影響，因為他們都是從事製衣行業。「入行後，爸爸叫我不如試下做自己嘅品牌，反正屋企一路以來都係做緊呢樣嘢，所以就一路籌備成立Dézert。」Dézert的設計靈感來自日本時裝，全因Tiger自小已愛讀日本時裝雜誌，加上他獨愛日本風，所以品牌亦順利成章以日本風格作開端，不過Tiger補充道：「都希望Dézert 嘅風格唔會好單一，所以好多唔同嘅產品都會嘗試去做，令Dézert 做到嘅嘢闊啲，同時可以畀大家睇到Dézert 係可以做到好多唔同嘅嘢。」

Tiger希望日後可以跟不同的品牌合作，甚至到不同的地方參展，而近日他就找了MIRROR兩位兄弟Lokman及Alton合作。「兩位兄弟加入後，希望可以做啲街頭感覺重少少嘅產品，令Dézert 更加豐富。」面對疫情，Tiger坦言在逆市中會影響外界消費的心態，但更大影響是生產線。「原本我哋嘅目標係希望品牌每個月都有少少新款出，但廠房都因為安全理由開唔到工，大概停咗一個至兩個月，所以喺疫情底下就唯有停一停，喺呢段時間我就計劃下今年Fall Winter嘅方向。」

ERROR的193入行前已在時裝界打滾差不多6年，所以推出品牌很有自己的想法，就以品牌名字LILABOC為例，其實是來自經典電影《阿甘正傳》中的金句：Life is like a box of chocolate的簡寫。「這句話的下一句是：You never know what you’re gonna get，呢句說話係話，人生好似你開咗一盒高級朱古力，裡面有好多味道，但每次你都唔知自己攞咗乜嘢味、乜嘢形狀，就好似人生咁，可能係好甜或者好苦都唔定。呢個好似我嘅諗法，所以我揀咗呢句說話嘅簡寫做品牌名字。」193甚至將品牌的logo都以電影的經典畫面呈現，不過阿甘的樣貌，就變成他最愛畫的火柴人。

LILABOC推出約一年，當中8成是女顧客。入行前主力做女裝的193很熟悉這班女性消費群，所以產品都針對他們而開發。不過由去年Talk Show《人到中年口不擇言》道歉招待會2019，到之後參與《花姐Error遊》、《娛樂風雲》、《Error自救TV》等綜藝節目及電視劇，193一直忙過不停，未能全程投入時裝生意裡面，最近終於空閒一點，未來數月他將會聚焦在時裝事業，設計更多新產品。

熱愛創作的保錡，除了ERROR的工作外，又以獨立唱作歌手身份推出歌曲，此外他亦有成立自家品牌Øbeginning1，原來品牌名字都跟創作有關。「Øbeginning1代表著品牌由冇變有、0變1呢個過程，當中有無限嘅可能性，而品牌名字就展示咗呢個創作過程。」相比起設計為先，保錡推出的產品其實更隱藏著他的演藝歷程與回憶，他說：「我想喺產品上記低屬於自己嘅回憶，譬如我講過嘅嘢，或者我作過嘅歌，每件衫都有個意思，都有自己嘅回憶喺入面。」三線同時發展，保錡坦言全部事情都靠自己一雙手去做，時間不夠，就惟有早點起身，瞓少一點，也絕不假手於人。

撰文：機