眨下眼農曆新年又過去，話咁快又要準備迎接情人節，唔知各位姊妹同你哋嘅男朋友仔有兩手準備未呢？每年情人節聽得最多嘅問題除咗「點解我無男朋友？」之外，就係「送咩花好？」如果睇緊文嘅你都有呢個煩惱，或者覺得你另一半有呢個煩惱嘅話，不妨睇吓呢9間花店介紹，甚至可以send比男朋友仔等佢及早做好準備！
情人節花店介紹一：agnès b. FLEURISTE
agnès b. FLEURISTE 嘅花藝師悉心設計出多款美輪美奐嘅情人節產品，除咗有花束、仲有花盒同玻璃瓶保鮮花。唔同款式嘅花藝產品務求令每位女生收到時都能感受到滿滿嘅甜蜜驚喜！
由即日起至2019年1月31日購買更加可以用early bird優惠價預購情人節產品！
小編最鍾意就係呢個La Loggia嘅花束系列！以單一嘅外國花材，襯出自然簡約風格，再以高貴嘅深籃色花紙包裝！加上品牌獨有嘅蠟章同鮮艷嘅品牌絲帶，花束當堂變得高貴奪目！
情人節花店介紹二：Gift Flowers
無論你係搵緊情人節經典款式嘅花，或者係想嘗試玫瑰新配搭，Gift Flowers HK 嘅花藝師都可以為你提供主意！如果覺得傳統花束好悶好無新意嘅話，呢個紅玫瑰方形花盒應該會啱你心意！特別得嚟，又有經典嘅紅玫瑰。
再唔係圓筒形嘅花盒一樣吸睛度十足！除咗呢兩款情人節系列之外，其實仲有其他款式，總有一款啱你心意嘅！
情人節花店介紹三：M Florist
紅玫瑰花束唔好比佢停！如果你鍾情紅玫瑰嘅話仲有M Florist介紹比你！24支或者36支嘅紅玫瑰花束都係每年嘅熱賣款！雖然話紅玫瑰老土，但睇嚟都仲有好多捧場客！
不過就算你唔係紅玫瑰嘅粉絲都唔緊要，M Florist 嘅粉紅、粉紫、同白色玫瑰同樣優雅大方！
由2019年1月20日至31號預訂仲附送特別服務，顧客可選取2月14日嘅送貨時間（0900-1300／1300-1800）。除此之外，仲有書法家幫你寫心意卡添！
情人節花店介紹四：van der Bloom
如果單一鮮紅玫瑰啱你心水，喺van der Bloom呢間花店可能會搵到你嘅dream bouquet！走小清新風嘅花束可能會成為今個情人節嘅新寵兒！
如果喺1月25日之前預定花束仲可以享有10%嘅early bird優惠！
邊個話一定要送玫瑰，繡球花咪一樣咁靚！
情人節花店介紹五：Flannel Flowers
唔like但一紅玫瑰嘅仲有另一個選擇，Flannel Flowers嘅拼花花束都會啱你心意。呢束粉嫩色系嘅Rose Quartz必定會令你少女心大爆發！除咗Rose Quartz，當然都有其他花束可以比你選擇啦！
好似呢兩紮Carmine同Mulberry，橙色色調同紫色色調加埋配花都超吸睛，如果唔like鮮紅玫瑰嘅你，Flannel Flowers 一定可以幫到你！
除咗花束之外，Flannel Flowers首次聯成香水品牌Diptyque推出情人節花盒！花盒入面除咗有新鮮奪目嘅花材之外，仲有Diptyque嘅香薰蠟燭，一個花盒送俾最愛兩種驚喜，仲一次過收到兩份禮物添！
情人節花店介紹六：Floristry M&L
如果想與別不同少少不如考慮下Floristry M＆L呢間時尚感十足嘅花店，佢嘅產品設計靈感係源自於大自然。
如果唔鍾意誇張但又想收下花嘅朋友仔不妨考慮下Floristry M&L。佢嘅情人節精選系列全部都細細紮，雖然係嬌小低調但絕對不失霸氣。
如果唔想情人節當日拎住紮花周圍走，仲可以揀花束配以花樽，咁就可以放開Office啦！
情人節花店介紹七：Floristry by Art of Living
Floristry by Art of Living嘅品牌概念係希望帶出花嘅週期就如人生，任何時候都應該活在當下。如果想訂花束又有花樽嘅話呢間會係另一個選擇！
花樽仲有大、中、小3個size比你揀，等你可以好好盛載綻放嘅鮮花，慢慢欣賞佢每一個階段嘅美態！
Floristry by Art of Living嘅發出靈感都係源自電影同書本，好似呢紮Moulin Rouge嘅玫瑰花束背後嘅金句就係“The greatest thing you'll ever learn is just to love and be loved in return.”每一紮花多有佢獨特嘅故事！
情人節花店介紹八：Le Sean
情人節又點少得保鮮花，保鮮花可以將你嘅愛意永遠保存！Le Sean今年聯成米奇老鼠推出保鮮花套裝，仲要係限量發售100套！
Le Sean 今年仲首次推出鮮花系列！為系列打頭炮嘅係The New Signature，有24支，50支，99支紅玫瑰，共三款大小比客人選擇，為你嘅伴侶打造驚喜浪漫時刻！
情人節花店介紹九：花藝研究所
除咗花束花盒之外，仲有浮游花！究竟浮游花又係乜東東？就係以特製嘅油保存花草，然後放入樽入面，效果晶瑩剔透之餘，仲可以令美麗延續不凋！
仲有乾花花束推介！主花特地選用庭園玫瑰O’Hara，花瓣層次豐富，乾燥後比一般玫瑰大、精緻，並且保留天然玫瑰香味！花藝研究所嘅情人節限定花品可以話係別出心裁，見到真係少女心大爆發呀！
**Follow us on:
- Facebook: CosmoHK
- Instagram: @cosmopolitan_hk
- YouTube: CosmopolitanHK**