【體路專訊】港隊男單猛將伍家朗周日（29日）於世界羽聯世界巡迴賽超級300澳門公開賽奪冠，自去年3月超級300德國公開賽後，事隔1年半再嚐捧盃滋味。今日（1 日）他於社交媒體發文分享奪冠感受，直言沒有期望下反而打出驚喜，更希望以澳門羽賽冠軍佳績，為新上任的港隊總教練黃綜翰帶來好開始。
伍家朗周日於澳門羽賽男單決賽面對新加坡「黑馬」鄭加恆以局數0：2取勝，成功捧得個人2024年第一項冠軍，亦打破相隔一年半的錦標荒。伍家朗今日於社媒發文喜言有進步：「終於終於事隔1年半之後再次奪冠，記得上年3月喺德國奪冠之後我話希望下次唔洗再等3年，今次用少咗一半時間，算係有進步啦！」
他於文中直言早前連續於香港羽賽及中國羽賽首輪出局令他感到沮喪：「還記得上2星期既香港同中國公開賽既首輪止步令我非常沮喪，最沮喪既唔係因為輸波，而係因為發揮唔出自己應有既水平，明明我知道原因係咩，但就係當刻控制唔到，咁先係令我最唔甘心。打完2站之後帶住好壓抑既心情嚟到澳門，連嚟到澳門哩個咁多美食既地方，我都冇出過去食野，日日就匿喺酒店食飯。」
他又透露首次於澳門奪冠是意外驚喜：「雖然被列為二號種子但唔敢對賽事太有期望，一心就係諗住今站唯一既目標就係揾翻自己應有既節奏，唔好理結果。但係世事好多時就係咁，有啲野越強求就越得唔到，唔諗既時候反而有意外驚喜。」
對於未來，他亦抱有更大期望，並希望澳門賽冠軍可為新任總教練黃綜翰帶來好開始：「15歲開始參加澳門公開賽，好開心今次終於可以喺澳門奪冠，亦代表我可以喺自己奪取獎牌既版圖上加添一個新既地區。因為我係第一次喺澳門打到入四強以上，希望喺我職業生涯完結之前可以將塊版圖再擴大得越大越好啦。同時多謝黃綜瀚教練既指導，佢即將以新身份帶領整個香港隊繼續前進，希望今次既冠軍會作為佢上任後既一個好開始。」
最後伍家朗亦不忘感謝球迷：「多謝從香港專登過嚟幫我加油，嗌到聲沙既球迷同我既屋企人，令我可以感受到就算喺澳門都好似喺自己主場比賽咁。Thank you Macau！我會永遠記住哩個冠軍！」
《體路Sportsroad》
屬於香港人的體育新聞平台
Facebook: https://www.facebook.com/Sportsroad/
Instagram: https://www.instagram.com/sportsroad.hk/