曼聯隊長麥佳亞季初被貶，此後都係以華拉尼搭馬天尼斯出任正選中堅。而家華拉尼確定會傷到世界盃，意味隊長麥佳亞會重出江湖，守住曼聯後防線。淨係聽到最後呢句，相信好多曼迷已經心驚膽戰。但佢喺「復出」後第一場比賽，就幫曼聯成功守住大門不失。週日英超主場對韋斯咸嘅比賽，麥佳亞再度搭配馬天尼斯出任正任中堅，成功守住大門不失，藉拉舒褔特嘅入波，完場贏韋斯咸1-0。
不過，呢場比賽嘅零封，真係麥佳亞嘅功勞佔最大份咩？先唔講賽後獲選MOTM嘅門將迪基亞，所作出5個撲救幾咁重要，右閘達洛今場嘅表現亦都非常出眾，5次奪回球權、4次地面截波、4次關鍵傳球等等嘅數據，都顯示出佢作為進攻型閘位嘅全能功架，今季喺坦赫手下完全體現到出嚟。
同時，勇於壓上嘅後果，就係佢同麥佳亞之間好容易出現大量空位，比韋斯咸左翼賓拿馬、攻中道尼斯去運用，上半場已經有追得慢而導致賓拿馬反擊嘅畫面，佢麥佳亞喺禁區亦有幾次漏頂嘅情況，多得達洛補位先至避免到惡果。早幾季喺蘇斯克查年代，麥佳亞係作為防守強點而立足正選。曼聯前場嘅壓迫方法會針對對方後場，迫佢哋出高波，然後比麥佳亞用過人嘅頂上功夫壓制中鋒，奪回球權。2020-21曼聯成功打出英超第二好嘅防守表現，同麥佳亞嘅狀態息息相關。
到咗而家，坦赫需要嘅係一個能夠配合佢體系嘅中堅，去fit-in佢以逼搶為主嘅戰術。而麥佳亞以往習慣打嘅左中堅位置，都要因為遷就馬天尼斯而改去右邊，用球習慣、球員配合等等都要重新適應。曼聯今季嘅防守強點係馬天尼斯，佢擅長前衝攔截，同防中夾擊持球者，移任右中堅嘅麥佳亞，唔單止要負責補位，更需要留意自己同達洛之間嘅企位，會點樣比對手左翼左閘去利用，畢竟達洛嘅進攻意慾，同麥佳亞之前喺左邊夾嘅梳爾，有根本上嘅分別。
要重拾狀態，真係需要一段時間，何況麥佳亞長期以嚟受自己嘅表現、球隊嘅成績、球迷嘅批評、乃至身為隊長嘅壓力所影響。希望呢場不失球嘅比賽，可以成為麥佳亞繼續搵返自己嘅動力。