相信大家去旅行，總會想去下當地隱世小店或大街小巷，無論咩地方都唔例外啊！而即將出發或計劃去台北，而且又中意文藝小物、精品嘅朋友有福啦！以下小編為大家盤點10間有特色台北小店，各位準備好紙筆mark低未呢？
中意文藝小物嘅朋友一般去台北都會行文創園區或者誠品，不過大家去多幾次可能都覺悶啦！有同感的話，以下10間小店肯定啱曬大家啦！
1. 小器赤峰28
小器赤峰28可謂中意文藝小物嘅朋友，到台北不得不去嘅地方之一啊！呢間小店位於赤峰街，一共有3層，每層出售唔同系列嘅精品或雜貨，絕對足夠大家行足一個下午啊！
一樓出售生活選品，而二樓出售服飾雜貨選物，三樓就主要為賣器皿品牌嘅專門店。而且仲會不定期舉辦節日優惠等活動，就好似嚟緊聖誕節，小器赤峰28除咗出售好多唔同類型嘅聖誕小物外，仲有感謝季(1/12 - 25/12)優惠添啊！大家可以買定啲聖誕禮物同朋友交換啦！
店內出售嘅小物又靚又多款式，大部分都係以簡約風為主，中意呢種Style嘅朋友真係分分鐘燒荷包啊～
小器赤峰28
地址：台北市大同區赤峰街28-3號
官網：https://thexiaoqi.com/page/articles_detail/578/
FB：Chifeng28
IG：chifeng28
2. PPAPER Shop
其實PPAPER Shop係一本名為《PPAPER》嘅台灣廣告設計雜誌衍生而成嘅選物店，當中出售嘅小物全部經過精心挑選，入面有好多都可能係大家聞所未聞，但非常特別且有價值嘅小眾品牌、老大品牌及新興品牌。
單單睇店舖外觀，相信大家都已感受到店舖獨特嘅風格同質感，感覺入面似展覽多過選物店啊！入到去就好似打開生活潮流嘅教科書，可以認識唔同新舊品牌之餘，仲可以慢慢欣賞產品當中嘅設計，真係令人大開眼界啊！
PPAPER Shop
地址：台北市中山區中山北路二段26巷2號B1
FB：PPAPER shop
3. 蘑菇 Mogu
蘑菇 Mogu為2003年成立嘅台灣設計品牌，專門出售及製作帆布袋、有機棉、天然染服飾以及生活雜貨為主，多以簡約線條及顏色設計。
店內貨品非常可愛，例如刺繡心口針、帆布袋款以及衣物都非常受歡迎㗎！
除此之外，店內2-3樓為"Mogu Cafe"，大家買完嘢行完仲可以上去歎個下午茶作休息，非常方便舒適！
蘑菇 Mogu
地址：台北市大同區南京西路25巷18-1號1F
官網：http://www.mogu.com.tw/
FB：蘑菇 Mogu
IG：mogu_tw
4. A Room Model
中意古著以及軍工裝嘅朋友，A Room Model簡直係福地啊！店主主要收集70-80年代古著、古董袋、飾物等，完全係古著迷嘅小天地啊！
而最值得大家去嘅係店內可以搵到好多獨特嘅衣物，仲有好多絕版嘅歐美大品牌服飾，如 Gucci、Chanel等！中意名牌嘅朋友都值得一去啊！
可能有唔少人會覺得歐美風嘅古著店總比人凌亂、大塵感覺，但A Room Model絕對可以大逆轉大家呢個負面概念啊！店內非常整齊簡單，入到去感覺好舒服，完全唔似賣二手古著，比較貼近日式簡約整齊嘅古著店風格，大家入去可以慢慢尋寶啦！
A Room Model
地址：台北市大安區敦化南路1段161巷6號3樓
官網：https://www.aroommodel.com/
FB：aroommodel
IG：aroommodel
5. 61note Select Shop & Tea
門外被林木包圍嘅61note予人感覺舒服又清新，而且店內貨品應有盡有，大量有特色嘅品牌幾乎都可以喺呢間選物店搵到，完全係揀禮物、手信首選，喺附近住宿或行經鄰近地方嘅朋友記得要入去逛逛啦！
店內商品包羅萬有，包括袋子、襪子、衣物服飾、生活雜貨等一應俱全，相信不論男女都會搵到心頭好啊！
61note同樣設有Cafe，大家行到攰不妨到Cafe休息，感受一下台灣嘅慢生活。
61note Select Shop & Tea
地址：台北市大同區南京西路64巷10弄6號
官網：https://www.61note.com.tw/
FB：61note
IG：61note
6. 時常在這裡
「時常在這裡」呢個名聽落非常特別又文青，因店舖無招牌嘅關係，大家到訪時可能要花多啲時間尋找店舖位置，但呢間舖不時外面都會大排長龍買限量糕點，所以不時都可以憑人龍搵到店子㗎！
當中出咗限量糕點比較出名外，仲有一個出售生活雜貨嘅空間，當中大部分精品都比較懷舊，感覺有啲似舊式蛋糕店以及精品店。
而店內不時仲會舉辦展覽，咁啱撞到有展覽嘅話記得入去睇下啦！
值得一提嘅係，店主營業時間比較唔穩家，大家去之前記得先留意店舖FB最新動態，了解營業時間先好出發啦，以免摸門釘啦！
時常在這裡
地址：台北中山區松江路194巷35號
FB：時常在這裡
7. 女巫店
女巫店對一眾中意音樂及文藝嘅朋友一啲都唔陌生啦！簡直係小巨蛋以外嘅音樂聖地！不時仲會有一班著名音樂人到場演出，例如張懸、陳綺貞、蘇打綠等等，都曾於女巫店表演㗎，而且仲會不定期舉辦活動，有興趣的話大家出發遊台北前不妨留意下！
當中除咗有音樂聽，當然仲可以叫杯咖啡、酒或餐飲坐底慢慢欣賞啦，入面嘅裝飾奇怪卻不失典雅，仲有啲非常有意義嘅小精品供大家選購！
女巫店
地址：台北市大安區新生南路三段56巷7號1樓
官網：http://www.witchhouse.org/
FB：www.witchhouse.org
IG：witchhouse1996
8. 日星鑄字行
同樣比較多人認識嘅「日星鑄字行」都可謂台北必去地之一啊！日星鑄字行保留咗以前鉛活字印刷術，入面仲好似一家博物館咁，眼見一粒粒鉛字放喺面前，就好似時光倒流到活字印刷年代，非常有歷史價值啊！
大家仲可以買朋友及自己名嘅字粒作手信，另外仲可以即場體驗活字印刷，對文化保育非常重要，可為台北之旅鑄上一個深刻而有價值嘅回憶啊！
日星鑄字行
地址：台北市大同太原路97巷13號
官網：http://www.letterpress.org.tw/
FB：日星鑄字行
9. Everyday ware & co
中意香氛嘅朋友準備好大燒荷包啦！皆因呢間小店較受歡迎係店主精心挑選來自歐洲嘅香氛，我諗單單揀氣氛都足夠大家揀半個下午啊！
除咗香氛，當然仲有唔同嘅精品、衣物啦，而且仲非常特別，例如水樽、服飾、家品等，單睇相已經好吸引啦，同樣都係男女都啱睇啊！
Everyday ware & co
地址：台北市中山區北路二段20巷25號2樓
官網：https://www.everydayware.co/
FB：Everyday ware & co
IG：everydayware
10. LOOPY 鹿皮
LOOPY鹿皮嘅風格同商品都真係非常非常可愛啊！中意可愛得意畫風嘅朋友一定要留意啦！LOPPY出售嘅商品大部分都係圍繞大自然以及小動物，再加上小調皮嘅風格，奇怪得嚟十分可愛，好啱中意奇怪風格嘅朋友！
當中包括心口針、衣物、袋子等，簡單一件服飾加上可愛圖案，感覺煥然一新！
當中仲有喺香港較多人認識嘅「右手超人」精品添！
LOOPY 鹿皮
地址：台北市大同區赤峰街41巷2-4號2樓
官網：http://www.loopy.club
FB：loppy
IG：loopyloopy
其實只要花點心思細心慢慢搵，每個地方都總會有其特別且值得欣賞之處，大家不妨計劃旅程時，挑選以上幾間比較方便大家行程嘅小店，Bookmark定到時去閒逛購物啦！保證會搵到大家啱心水又特別嘅手信同禮物啊！
圖片來源：FB@小器赤峰28、FB@PPAPER Shop、FB@蘑菇 Mogu、FB@A Room Model、FB@61note、FB@時常在這裡、FB@www.witchhouse.org、FB@日星鑄字行、FB@everydayware、FB@loopy
Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）