搵食啫！犯法啊？我想㗎？
喺香港，好似咩都有得炒咁，炒樓炒股炒鞋炒袋……仲可以炒shake shake 粉，真係不禁講句世事無奇不有。有時真係好想睇吓班人諗開D咩，想知道喺佢哋世界入面係有咩唔炒得，你話，普通人點諗到shake shake粉都可以炒㗎？shake shake粉攞嚟食㗎嘛！無他嘅，咪好似子華神咁講囉：「人類嘅終極理想都係不勞而獲。」轉個手賺一筆，好多人都會覺得唔炒咪笨！今日就等DailyView用網路大數據同你講吓，香港人上年除咗炒樓炒股炒鞋炒袋等等，仲鍾意炒咩！
DV小教室：香港網路大數據觀測咗近萬個網站頻道(而且不斷增加ing)，包括港澳地區的新聞頻道、FB、IG同埋各大討論區、Blog……透過強大嘅網文爬梳觀測，攞到巨大嘅資料樣本數，拎到上億嘅文章及留言訊息，以人工智慧的語意程式做分析。
10 炒咪錶
──無成本，公家地方私人生意
依家喺香港地揸架車話想搵個咪錶位擺喺街都難，成日左兜右兜都唔見有位，淨係見到層出不窮嘅霸位方法：雪糕筒、人肉霸位、鋪頭車霸位等等。想話喺深水埗、九龍城、山林道、天文台道……等等嘅地方泊咪錶位？咁你就焗住食炒價啦！一個位15分鐘賺20％，冇成本做生意，好多時仲唔入錶賺盡你！你想報警解決問題？對唔住，差人嚟到都處理唔到，最多抄轉牌。但人到街頭，街尾都入晒錶喇。
image source:wiki
9 炒廚師腸
──腸？定係搶啊？
上年年尾，美國廚師牌雞肉腸因為母公司破產而面臨停產，震驚港人。廚師腸會出現喺香港人嘅早午晚三餐、燒嘢食同埋打邊爐，無咗點算啊？咁大件事，好多精明嘅生意人就從中搵到商機！喺市面仲有大量嘅廚師腸，甚至超級市場都特價緊嘅時候，就已經有人開價200蚊出售，曲直難分！不過最近本港代理「大昌行」話，會用返同樣配方再生產，炒家們應該要食一排喇！
image source:Facebook:DCH ValleyChef
8 炒的士牌
──有牌好過有樓！
依家香港大約有18000個的士牌，有近4成係公司持有，最近市價大約560萬。「公司牌」、十大車行就話冇炒賣，冇合謀定價，但的士牌價政府冇徵稅、冇監管、冇留底，咩都係聽大車行同「的士聯合網站」公布，信唔信得過就真係大家諗諗喇！其實唔止咁，的士牌最好搵係收租，日更加夜更夾埋大約1000蚊一日，一個牌一個月有成二萬幾三萬蚊租收，嘩！好過樓租！
image source:wiki
7 炒場紙
──未解決，亦未有得解決！
香港人想收工、放假同朋友打個波，有幾多人會走去康文署體育館到book場呢？唔敢講一定冇，但可以講話唔多囉！市民一早6點鬆D就去體育館排隊，諗住book嚟打吓波，永遠都冇晒場。究竟D場去晒邊呢？咪去晒好有生意頭腦嘅炒場人士到囉！用團體優先訂場嘅方法，book晒d場嚟炒，真係想打波嘅市民無場咪唯有同佢哋買。最近康文署就話如發現炒場就停優先訂場6個月，唔知今次work唔work呢。
image source:wiki
6 炒月餅
──人月兩團圓，月餅價更高。
中秋佳節，本應係小朋友玩吓燈籠，大人開個月餅嘆住賞月，陪吓屋企人順便放鬆吓壓力嘅日子。但係勢估唔到人月兩團圓嘅日子，都成為投機人士嘅炒賣機會！好多人大炒「美心流心奶黃月餅」！喺上年中秋節前一個月，月餅開賣就大排長龍，炒家們一磚磚月餅卷咁掃，搞到全城提前成個月慶祝中秋咁。不過喺中秋前，好多炒家都放唔出D貨，網上個價仲低過官方賣，真係秋風送爽啊！
image source:Pixabay:Gwen24
5 炒疫苗
──細個喊住唔打針，依家喊住要打針。
近年好多中國大陸嘅人嚟香港打針，網上仲出晒攻略教人點做，普遍中國民眾對中國嘅疫苗冇咩信心咁。原因好多，例如中國疫苗造假、唔合格，又例如某D針中國冇提供等等。但香港依一個彈丸之地，各界配套、資源要全面照顧所有香港人都已經好難，試問又點顧及埋中國嘅人呢？搞到D疫苗貴晒，又排得耐，好多香港人都冇得打啊！不如試吓俾D信心國產嘢啦！中國人！
image source:Pixabay:PublicDomainPictures
4 炒車位
──2.5m x 5m = ?
依幾年，香港好興炒車位，好多投資者話車位易入手，回報唔錯又穩定，出租同轉手賣出去都有市場。上年6月何文田天鑄一個車位以600萬成交，完全證明到車位係香港有價有市。香港地真係寸金尺土，你點諗到有條數式係「2.5m x 5m = 6m」？不過有投資者話，個價唔係炒出嚟，而係香港車位本身唔夠，市場只係反映需求。咁係嘅，每個月23號去荃灣多層停車場睇條龍，明晒啦！
image source:wiki
3 炒Bitcoin
──虛擬貨幣？加密貨幣？定係商品？
Bitcoin係由中本聰喺2008年發表嘅論文提出、建立，屬於脫離中央銀行發行嘅金融、貨幣體系。Bitcoin本來概念好好，加上有人、公司同埋國家信任，價值就自然上升，同時引嚟唔少投資者入場。因為利潤太高，有人一入場投資就獲利唔少，好快吸引到大眾目光，「礦機」、「掘礦」一時間成為香港熱話。不過有好多不法份子藉機會呃人，市民真係唔好貪心搵快錢啊！
image source:Pixabay:sinisamaric1
2 炒演唱會飛
──香港人被牛劏到一頸血！
香港地黃牛黨好國際化，有講本土廣東話嘅，有操流利普通話、英文嘅，非常合乎國際市場嘅需求。同埋係有晒架構、組織，做到成盤專門嘅生意咁，非常猖狂！上年子華神已經怒罵黃牛黨，叫班fans唔好幫襯黃牛，同希望有關部門正視問題。但好可惜問題仍舊無變，場場受歡迎嘅演員會都有黃牛，好似上個月韓國防彈少年團咁，一張飛炒到近10倍高價，好多人嚟到門口都冇飛入，整喊晒班妹妹仔！
image source:wiki
1 炒iPhone
──iPhone神話會唔會又起？
香港地炒iPhone大上大落，由iPhone4開始到iPhone5s，炒iPhone一定炒得起，係睇你賺多定賺少。嗰陣時，依頭攞機，嗰頭入先達放，真係分分鐘轉個手賺多部機自用。而iPhone6、6s同iPhone7、7s，啱色同大機都有得賺，手快D都可以執唔少。不過由2017年iPhone8開始，iPhone就唔止炒唔起喇，好多仲首日就損手離場。唔知今年iPhone神話會唔會再起呢？
image source:Pixabay:raphaelsilva炒賣為咗咩？
其實點解香港人咁鍾意炒賣嘢？有錢嘅炒樓炒股，冇錢嘅炒iPhone炒飛，佢哋為咗D咩呢？為嘅係兩餐晏仔？定係為搵更多嘅錢？子華一句：「搵食啫！犯法啊？」完美講出金錢至上嘅香港地嗰種荒謬價值觀。唔好問點解香港會變到咁，因為好多香港人會答你：「我想㗎？」
分析說明：
本研究資料分析時間範圍為2018年4月21日至2019年4月22日，共一年。
網路大數據系統觀測港澳地區上萬個網站頻道，包括新聞頻道、Facebook、Instagram、Twitter及各大討論區、部落格等，針對討論『香港人炒賣』相關文本進行分析，並根據網友就該議題之討論，作為本分析依據。
本文分析之結果，非參考投票、民調、網路問卷等資料，名次僅代表網路討論聲量大小，不代表網友正負評價。