《澄清關於 MIRROR 事件 PTSD 之誤導資訊》

唔係去到最極端嘅情況， 我哋都唔想出聲。但今次見到有一篇咁樣嘅報導《專家推算27萬人患PTSD　有人見12子廣告湧負面情緒》， 作為一個推廣心理學嘅團體，我哋有責任指出呢份報導係誤導、欠缺事實根據、 而且違反心理學界對 PTSD嘅普遍認識。

首先， 根據《精神疾病診斷與統計手冊第五版》 創傷後壓力症嘅診斷準則， 除非受害者係你嘅親密家人或朋友（A 1.3）項或者你因工作理由持續或接觸到創傷的極端可怖細節 （A 1.4 “repeated or extreme exposure to aversive details of the traumatic event”）， 否則喺電視或者網絡上睇到意外發生嘅片段， 係唔構成PTSD。

其次， 新聞引述嘅研究數據係完全冇列明出處。 我地做過學術搜尋亦見唔到有期刊發表相處嘅結論，希望文中所謂嘅專家補充研究數據，因為有公信力嘅新聞引述之數據需於學術研究期刊上發表，而唔係「嗱， 根據我哋嘅專業觀察呢，就大約會咁多人患上PTSD嘅。」 喺缺乏有公信力嘅研究數據之下， 貿然估計香港會有 27 萬人患上 PTSD， 極度不負責任。

今次我哋急於澄清，係因為病態化壓力症狀對個社會係極唔健康，亦都不利真正患上 PTSD 嘅朋友求助。 面對重大嘅事件， 感到強烈嘅情緒反應係人之常情，唔需要病態化。 希望各位網民警惕心理學假資訊， 並在亂世中保持清醒。 如各位受MIRROR 事件， 你睇返我哋之前YouTube頻道嘅建議，或者參考喺香港可靠嘅心理學專業組織，例如香港心理學會臨床心理學組及輔導心理學部所作出嘅建議。

▼Follow 樹洞香港 TreeholeHK
Website: https://treehole.hk/blog/
Facebook: https://www.facebook.com/hktreehole
Instagram: https://www.instagram.com/treeholehk.psychology/?hl=zh-tw