2024年的洪嘉豪
經過稍為沉寂嘅2023，洪嘉豪2024狀態大勇，推出一系列不同類型嘅作品，而且相當受歡迎，為樂迷帶嚟豐富一年。
「戀後駕駛 讓我最高速的開 情路背後藏異彩」
年頭由《黑玻璃》打頭陣，與愛人喺車廂內懶理外界紛擾，享受二人世界嘅浪漫。院長以輕快旋律唱出甜蜜瀟灑之愛意，相當有新鮮感，亦意想不到地成為去年最火熱嘅作品之一。
緊接一首型格跳唱作《Truth or Dare》，道出戀愛中互相猜度嘅心情。我地總會盼望先得知對方真正想法，無勇氣直接表露心意，生怕受傷害。愛情就係有令人神魂顛倒嘅魔力，內心多忐忑依然繼續追求。
「誰叫我很喜愛 凝望你側面 明明閒角 卻自覺 在放閃」
深愛一個人時，即使自己被當諧星，做嘅一切被當笑話，都要裝作毫不在意。只要能夠留喺愛人身邊，付出多少亦在所不惜，見到對方快樂就咩都值得，甘心卑微地成就依位主角。《衰仔樂園》悲情地唱出一部傷感喜劇，無奈卻寫實。
「我要拆開 全宇宙 全宇宙 當我每次拆開 人與事 如禮物落在我手 神奇而罕有」
到演唱會前，嘉豪推出令人眼前一亮嘅專輯《Inner ǀ Child》，收錄一眾新作。《拆禮物的孩子》站在小孩角度，發掘對世界嘅好奇與憧憬，帶大家開始依段音樂旅程；《明星示範生》演上一段幻想成為明星嘅內心小劇場，輕快旋律配上玩味演繹，讓聽眾沉醉喺音樂嘅愉快中。
「他內心極庸俗 卻以叫喊聲朗讀 「高尚者沒情慾」 叫世界拜跪臣服」
《預言家》以暗黑寓言風格，霸氣地震攝人心，當各方妖魔鬼怪都發出預言，究竟如何分辨孰正孰邪？《逆便所》帶出被欺凌者沉重嘅控訴，縱使習慣被傷害，看似並不在乎，但憤怒正一點點累積，無奈亦無助，只可盡力捱過去，再等候一個反擊機會；《漫天星》帶院友們放鬆地欣賞大自然與愛情，只要有心上人在旁，簡單寫意足以甜入心扉。
依張專輯再次實驗院長不同可能性，豐富又帶出滿滿驚喜，證明洪嘉豪唔係只擅長唱悲情歌。
「真的不要再明我 拜託 拜託 喝完這杯 走 可不可」
演唱會後，院長再以兩首抒情歌讓樂迷一飽耳福。《拜託》道出失戀後縱使心情崩潰失落，但比起同身邊人訴苦，更渴望有空間讓自己隔絕世界，好好沉澱，慢慢抒發傷感，依個或者就係成長。
「不需要假裝高興 來掩飾心情 You don’t have to change a thing」
《跟你分擔失落比較快樂》則唱出男生希望愛人無需隱藏任何情緒，做最真正同舒服嘅自己。有咩唔開心只要你肯講，我一定肯聽，就算未想表達，我都願意一直守護在旁，隨時準備好提供擁抱，多困難嘅事，分一半比我就會變得簡單。
「明明已經發生 的美好 你感覺到 可惜不夠膽 錯得更離譜」
踏入年尾嘅《我感覺到》講述一段朋友以上，彼此有感覺卻無法走近嘅關係，係鮮有嘅男男合唱情歌。縱使對眼前人心動，但依種感覺係兄弟情定愛情，內心無法亦唔敢交出答案，令此情無疾以終，心酸至極，亦為嘉豪2024音樂之旅寫下充實句號。
「而生命很多小插曲 誰闖入竟邀請放縱 靈魂還很凍 然而毫不察覺被你煽動」
除咗一眾出色出品，院長去年仲首次登上紅館舞台，係一場總結佢出道以嚟成績嘅演唱會，成功為院友們帶嚟精彩一夜，為嘉豪依個平凡名字寫下不平凡一頁。我有幸喺現場見證依個夢想成真嘅時刻，院長台上滿足嘅笑容，以及完場後個份感動絕對畢生難忘。
“I’m a superstar” “I’m a superstar”
而2024嘉豪喺各大平台播放率亦相當理想，樂迷數量倍升，達成一個個里程碑。特別係事隔多年再次踏上叱咤頒獎台，由當初滿腔熱誠，帶點稚氣嘅新人，到今日成熟穩重嘅歌手，當中過程絕不簡單，感謝院長願意堅持至今，用音樂為樂迷紓憂解困，
昔日嘅窮小子轉眼間成為明星示範生，作為院友能夠沿路陪伴院長成長實在太幸福。不過依個只係佢歌手生涯嘅開初，未來尚有漫漫音樂路要走。2025再做多啲好歌比大家啦！
「你也像 漫天星 漫天星 這晦黯心臟給你承托跟佔領」
最後，想講句洪嘉豪你自己作曲作詞嘅歌係好正㗎！
▼Follow hkpopculturelover
Instagram: https://www.instagram.com/hkpopculturelover/