林作「抽水」陳凱琳細佬混血樣　陳媽媽曾回應：出世嗰陣好白淨

陳凱琳（Grace）跟龍鳳胎細佬Derek多次被指「愈大愈唔似樣」，到日前Derek在父親節當日公開一張同爸爸的溫馨合照時，再次因為外貌及膚色跟「百分百華人樣」的爸爸完全不同而成為熱話，當中出曬名鍾意「抽水」的林作更在社交網站揚言願意用100萬向Derek發出挑戰，要求他驗DNA證明父子關係。

對於Derek的外貌質疑，其實Grace之前受訪時已經回應過，指自己同細佬是龍鳳胎，當然希望同細佬似樣，又話BB時期同細佬最似樣，但去到中間階段無咁似，到長大之後又慢慢變返差唔多樣。另外，陳媽媽去年接受車淑梅電台節目訪問時亦有回應過Grace及Derek擁有混血外貌的原因：「其實Grace同Derek龍鳳胎出世嗰陣同大家姐一樣非常白淨，但突然喺14、15歲嘅時候眼大咗、臉尖咗，阿仔鬚根多咗，可能我嘅媽媽係馬來西亞人，擁有亞裔嘅容貌，細路又喜歡戶外活動，又或者加拿大嘅食物有好多荷爾蒙啦！」但節目出街之後，不少網民都對陳媽媽的解釋感到疑惑：「咁都得？」、「有人信？」、「基因突變？」