【新歌MV繼續唔見人】樂壇唱作新人黃明德（Dark）早前推出首支派台作品《留班同學》，隨即打入五台流行榜十大位置，歌曲更於商台「叱咤903」及港台「中文歌曲龍虎榜」上升至最高的第二位，成績十分不錯。昨日（20日）Dark推出第二首派台作品《沒有穿校服的日子》，繼上次參與半首的作曲，這次作曲部份由他和廖志華主理，填詞方面則繼續由林若寧操刀，編曲、監製找來Mike Orange擔任。
《沒有穿校服的日子》MV：
每個年代都有屬於自己的校園流行曲，今年就讀中五的「留班同學」Dark，用第一首作品介紹自己後，再以《沒有穿校服的日子》希望紀錄這兩年被偷走了的校園生活，「首歌當然係自己嘅故事，但其實都想代表好多唔同嘅中學生去講自己嘅心聲，所以一部份係自己故事、一部份係所有中學生喺呢個疫情底下嘅故事。」他表示特別喜歡最尾一段的副歌部份，因為除了真的有自己的故事在其中，相信很多學生也有這樣的經歷，「『當老師處罰我 當女班長望我』當你係低form嘅時候，未初嚐戀愛滋味，唔好話女班長，有女仔望你都係好興奮。所以呢啲都好令我置身於好似返緊學或者校園的氛圍當中。」
MV方面，Dark再次「唔見人」，以動畫手法呈現，Dark透露一開始有想過真人拍攝，但因為這首歌也是「校園」題材，於是便想延續《留班同學》的概念，於是再次沿用動畫方式，不過畫風卻稍為改變，希望帶給大家新鮮感。至於MV中的動畫，原來亦加入了Dark的畫作，「係一男一女着住校服，但佢哋手同手之間牽連住一個口罩，上面有個疫情嘅生日蛋糕，就係代表呢兩、三年，我哋都要圍繞住疫情渡過，中學生又好、小學生又好、大學生又好，總之係所有學生。」除了自己畫作，歌曲的部份鼓聲，也是由Dark負責，「想多啲參與自己首歌，今次打鼓係一個小嘗試，希望將來嘅歌可以愈嚟愈多自己嘅參與，最想就係成首歌嘅結他都自己彈。」
另外，Dark亦親自邀請了自己幾位同學好友齊齊為歌曲錄音，因為他認為這是一首屬於大家的「校歌」，「因為我哋冇得返學校，冇得早會喺禮堂入面唱校歌，所以想作一首歌，希望營造一個大家一齊去到最尾嗰段，都係唱緊自己心聲，有個凝聚力，一齊去大合唱咁樣。」Dark又踢爆朋友前往錄音室時十分緊張，不停問：「會唔會俾人鬧㗎？」十分搞笑，Dark表示，「一開頭佢哋睇我錄，到錄佢哋部份時，佢哋有陣時會忍唔住笑，監製Mike Orange就同佢哋講：『認真啲啦。』不過我都好慶幸佢哋應承我幫手，同埋佢哋真係有聽我首歌去唱㗎。」
#黃明德 #留班同學 #沒有穿校服的日子
#香港音樂人 #香港製造 #makeinhongkong
#香港人撐香港音樂 #撐廣東歌撐谷Live #香港音樂
##2022廣東歌 #新歌
----------------------------------------------
👍🏻 Facebook：https://bit.ly/2HZAgDL
♥️ IG：https://bit.ly/34PhuYx
⭕ YouTube：http://www.youtube.com/c/谷Live
🏆 谷撐音樂流行榜：https://bit.ly/3sECI7C