網民查案 鄭中基休息原因撲朔迷離 湘姐係小三定穿櫃桶底？

1 「我間中飲醉酒 很喜歡自由 常犯錯愛說謊 但總會內疚」當年憑《 無賴 》爆紅，今日佢都成為呢首歌嘅男主角。由影視圈成功撈埋去 You Tube 界、成立機動電視台嘅鄭中基（Ronald），突然宣布同經理人湘姐（何慶湘 ）割席，直指對方工作及道德操守有問題，又話自己因為健康同情緒問題需要休息一段時間，引起全城熱烈討論。之後鄭中基再發長文，自我引爆，指一直都存在的酗 酒問題，從未有解決。

2 鄭中基直言，自己患上抑鬱症，並做咗錯誤決定，「大家平時見我大癲大肺、拍搞笑戲、開channel拍片、開演唱會，表面上好似無嘢。其實咁多年黎都仲係一個唔識得面對壓力同唔成熟嘅人。」佢亦主動提及2000年飛機鬧事，之後決心戒酒，再到2010年被爆出同阿Sa秘婚再離婚，「呢段婚姻令到我好唔開心，亦好好咁反省過自己嘅問題。」

3 佢特別向太太余思敏同仔女道歉，話太太將會陪佢一齊去美國參加戒酒中心療程，「我會用時間同行動去證明我會努力做好丈夫、爸爸同鄭中基既呢個決心。」

4 網民一方面為佢打氣，另一方面，唔少網民都突破盲腸，「都係無交代關何慶湘咩事…」、「飲酒點對唔住老婆仔女呀？」

5 對於湘姐事件隻字不提，反而令大家更多遐想。 陳志雲開網台就爆料話，有同鄭中基關係密切嘅人透露，鄭中基係係終止同何慶湘合作，間公司仍然係鄭中基嘅；又話鄭中基對網台的營運參與不大，開台以嚟淨係課金一次，所以舊年公司一口氣簽6個新人，開支幾大。「坊間話何慶湘係好勤力跑數，但佢淨係同鄭中基接job，唔幫太太接，有啲拗撬出咗嚟。」佢仲估計鄭中基個聲明分分鐘搵人代筆，「佢唔會寫到咁撇脫，咁絕。」

6 唔少網民估二人關係非淺，亦有網民話收到娛樂圈打滾嘅朋友及喺YouTube界既朋友分享，「H小姐係R先生粉絲，雙方有一啲不可告人嘅關係」，仲話老婆搵人查帳，結果發現公司條數唔啱，傳接近8位數字，就以離婚作威脅，最後就出現宜家嘅局面。

7 至於喺鄭中基宣布割席前夕，太太余思敏率先出story預告，「Good morning HK. Something big are coming…want to see？」仲tag埋鄭中基、何慶湘同機動電視台，暗示忍唔住就要大爆料。

8 出道廿幾年，鄭中基轟動嘅新聞都離唔開女人。今次一個係工作十年嘅夥伴，一個係理應長相廝守嘅老婆。究竟係有小三定有人穿櫃桶底？唔，why not both？

▼Follow 娛頭
Facebook: https://www.facebook.com/profile.php?id=61554772610166