滑板運動員俊仔揭兼職月薪$3880　透露追夢辛酸：話「冇乜錢要使」真係太誇張

乘著奧運熱潮，加上香港運動員奪兩金兩銅的佳績，引起大眾關注本地運動員發展和待遇，早前港協暨奧委會義務秘書長楊祖賜接受訪問，表示雖然香港運動員收入不算高，但已包教練、醫療、住宿費用，更稱「佢哋無咩嘢要使錢。佢應該可以能夠從容地做運動員。」此番言論引來香港滑板運動員俊仔出文回應，透露兼職運動員月薪只得$3880，對於基層出身的運動員是「過唔到」。

俊仔於Threads分享在港做兼職運動員的辛酸，他直言：「本來都唔諗住為，呢單新聞講啲咩，但係講到話冇乜錢使呢個真係太誇張，有D運動有啲家底就叫做好彩可以繼續到，大把基層運動員都過唔到，我自己就係基層出身，你諗吓我成為精英運動員嘅時候都差唔多30歲，但係我part-time運動員嘅人工係得$3880一個月，雖然成為精英運動員都有一個錢可以俾我去海外訓練，可以去到兩至三次，視乎你去咩地方，但係我想講，如果我正正經經返份工應該唔會得三千幾蚊一個月掛，繼續落去都係純粹叫做好過冇，仲要我哋係行精英運動員制，所以如果攞唔到獎我嘅人工或者我個等級就會減少，有呢啲壓力之餘又要搞吓啲人際關係，唔係唔俾你出賽咁嗰陣時就大X鑊啦，而我最好彩可以繼續踩到板係因為Vans ，因為佢哋由零七年，送我出去其他地方踩板同俾人工我到而家，基本上冇一個牌子會願意支持一個運動員咁耐，所以都係點解我去到邊都着住vans，去到呢度肯定有鍵盤戰士話你揀得呢份工就預咗㗎啦，但係我覺得冇錢都唔緊要啦，仲要贏唔到比賽仲要上網俾人X，去吓做其他工作又俾人X，去得比賽邊個想輸，邊一個人冇認真練習過，運動員時間有限，我諗行得呢條路都係燃燒自己嘅青春去追自己嘅夢，係值得擁有更好。」

俊仔及後再出Post，希望大眾「多啲留意運動員」，透過Social Media去關注和表達支持，也能間接令運動員增加曝光，有更多機會增加收入來源。

早前劍擊金牌得主江旻憓受訪時稱：「香港做運動員好幸福！」，有網友就直斥言論「離地」，俊仔亦回覆指劍擊項目有「前人種樹」，相對是比較幸福。

圖片來源：Threads 、IG@chunchai

《好有脆》專門發掘社交媒體熱門帖文，所有內容及相片版權均屬發布人擁有。