一個是玩健美的「巴西」(外號)，另一個是踢波的「巴西」，如果兩個只能活一個，你會點揀？ (世事嘅嘢就係咁殘忍)
先天好，後天好，每個人或許都有其樓底，限制了他站起來的高度和向上發展的可能性。有些人的樓底是讀寫障礙加 ADHD (A仔 – 專注力不足及過度活躍症)，他們不會有機會於畢業禮致謝詞，sorry；你住劏房，便不能在家中練大提琴/北斗神拳，sorry；如果不幸只有曾志偉的高度/聲調，你不敢向女神申請當兵，sorry。
郭靖雯 Iris，唔好俾個名呃左，佢一啲都唔文靜，流著巴西血液的小女孩，小學時已經剪個男仔頭，混入屋邨班男仔由朝到晚踢波。她被四個樓底壓著：
樓底(一) ：是中巴（巴西）混血兒 (所以大家都叫她「巴西」)，細個時被同學歧視
樓底(二) ：6歲時父親離世，家境清貧，靠巴西籍的母親 (當時完全唔識廣東話) 養大她和兩個哥哥，一度要領取綜援生活，資源極之匱乏；
樓底(三)：涉嫌係A仔，坐唔定，冇興趣讀書 (大過咗病情有好轉，訪問了兩小時都可以坐定定，好似好留心咁)；
樓底(四) ：好揀唔揀，選擇了踢波為職業，仲要係女足，唔慌搵到錢，點生活? (通常係話自己追夢的人嘅下場)
Iris不甘被樓底壓著，站起來重劃天花線
雖然 Iris 被樓底壓得重甸甸，卻努力把天花線向上重劃。她是前港隊女足代表 (將來可能重召歸隊)，目前效力女子聯賽班霸「頌恩公民」(自2014年)，年初被西班牙乙組球隊「華歷簡奴」邀請加盟，也曾從中女超 (中國足球協會女子超級聯賽) 球隊「浙江杭州銀行 」往昆明試腳，作為港女足有機會外流作戰，突破樓底，提升了女足的天花線。
另一邊廂，機緣巧合下 Iris 踏了入健美 (body building) 的世界，不單比賽獲得亮麗成績 (2022全港沙灘健美賽冠軍)，更成為 Fitness 教練，在球會及私人任教，為自己開展另一條全新的天花線。
Iris 強調 sport model 健美不是鬥大隻，是展現線條美，見到
約了 Iris 在深水埗運動場做訪問，令我諗起去年也在此與阿歹 (謝覺偉) 做訪問，阿歹曾經是甲組球隊傑志的隊員，可惜坐了一季後備席，黯然轉場去玩跑，成就了另一個宇宙。Iris 問我洗唔洗帶埋個波嚟? 我話如果冇乜嘢事，我哋應該係看台傾多。
可惜 Iris 冇帶足球嚟，冇得欣賞我身懷士巴拿踢波嘅身影
故事從「嫁到這世界邊端」開始
「我媽咪係巴西人，爹哋香港人，婚後就在香港定居，媽咪從此未回過巴西。我6歲時爹哋因 cancer 去世。」
「你媽咪一個人照顧三個細路一定好辛苦。」
「我細個好窮，媽咪唔識聽唔識講廣東話，英文又唔得，好難搵工，我哋要攞綜援生活。我上網幫佢搵工，填表、打電話俾公司，甚至陪媽咪去見工，人哋見你咁大個人仲要個女陪住見工，又唔識中文，唔會想請，只能搵一啲唔洗講唔洗寫嘅工。」
「而家媽咪嘅廣東話已經好流利，做緊包裝工作。我同阿哥出來工作後就冇再攞綜援。」
好有愛的家庭
兩兄妹都Cute爆，睇個棣都似坐唔定嘅細路
咪話我口花花，兩姊妹囉，點會係兩母女
「媽咪會唔會想返去巴西？」
「佢話我爹哋走果時，如果唔係要照顧我哋三個，佢真係會返去巴西。但諗到巴西有幾窮捱得幾辛苦，決定留下來。香港嘅生活、教育一定好過返巴西。到我同阿哥有能力時，我哋話買機票俾佢去巴西旅行，但佢都寧願係香港同我哋一齊。」仍記起溫馨的一對手，始終給我照顧未變樣。
大個唔想再窮
「你細個有冇窮嘅感覺?」
「有，見到阿媽要問隔籬屋借錢。所以我十六、七歲已經開始做 part time，有啲 Miss 俾機會我去球隊做助教，女教練又吃香啲，返兩個鐘都有百多元，好過去老麥。當波友好開心玩嘅時候我就去返工。」
「有冇覺得窮係一件幾慘嘅事，會好唔開心?」
「果時諗，我大個左唔可以窮，唔想再有金錢嘅壓力。我記得我同自己講，出嚟做嘢後唔可以再問阿媽攞錢。」難怪有人說貧窮對小朋友是祝福多過係不幸 (當然要睇下窮成點)，不過窮令人上進定沉淪，亦取決於家庭、性格和與那些人一起成長，呢啲帶晒頭盔說法我較擅長。
胼手胝足的生活奮鬥，與背後的一段異國情緣，營育出一位尋夢的混血女孩。見證香港的開放多元，同時是創造機會、實現可能的福地。希望這不是個「曾經」的故事。
夢大個天 – 從街童到港隊到西班牙乙組
「我小學二、三年班已經剪個男仔頭，跟阿哥落街踢波，成班人得我一個女仔，要跟到佢哋嘅速度同技術。」一隻羊跟住一群獅子長大，她不會再是隻羊，會變成獅子，仲會電埋同一個爆炸頭。
「六年班時我跟同學參加北區的足球青訓，可能跟慣男仔踢波，好快被教練捉了去葵青女子足球隊，亦即是「公民」隊前身。」香港女子足球聯賽於2012由香港足球總會接辦，首屆冠軍就是由公民奪得。
堅想加入「頌恩公民」女子足球隊 – 做波僮
「日日放左學由太和去葵青踢波，初時同一班年紀細啲嘅妹妹隊踢，到左廿一、二歲升上同大姐姐一隊。果時叫公民，是班霸，連續六、七屆攞冠軍，我踢後衛中場，好鬼舒服，對手好少機會攻到過嚟。」踢波都有hea位。
「以前香港女足純業餘，而家有半職業女子球隊，例如傑志，有少少薪津，減輕生活壓力，吸引好球員。那時我日間係社福機構負責帶活動，因為我唔可以坐定定工作。」
「年初教練說有西班牙乙組職業球隊『華歷簡奴』，看了我比賽的影片後，邀請我簽約。因其中一位球隊老細是中國人，希望有國內或香港球員加盟。要在一個禮拜內決定。西班牙今年攞咗女子世界盃冠軍，是女足的光明頂皇者，能在歐洲踢波對我來說好夢幻，好想知自己的水平相差幾遠。」
不過夢同現實總有落差，「起初以為教練識英文，但去到至知係唔識，好難溝通，同期有幾位識英文的，但大家都爭緊出場機會，未必咁照顧你。自己一個人要解決好多問題。球隊練完波會去 gym 自己加操，希望快啲追上大隊水平。自己報語言學校學西班牙文，開始可以係球場做簡單溝通，聽得明指令好重要。而家去餐廳可以 handle 到。」求生，就是讓你攞出最大本領的好機會。
Iris是繼陳頌文之後，另一位公民球員往歐洲發展，可惜後來劇情有變，否則此球衣可能香港有得賣
左是 Iris 其中一位伯樂公民教練梁冠聰，與華歷簡奴的教練令 Iris 走得更遠
要追上頂級水平，要有強大的心臟和頭腦
與西班牙球隊合照，Iris一點也沒有不違和
「你覺得同隊友最大差距是什麼? 體能定技術?」
「我覺得係技術，體能方面我有一定基礎，畢竟佢哋係職業球員，日日操。過左三個禮拜，我覺得大家開始接近，雖然仍未去到佢哋水平，同佢哋踢友誼賽我係跟到，係西班牙我有好大進步。」
與中超擦身而過
「我嘅教練 (梁冠聰) 認識一啲中超嘅球隊，年初時佢對我說有中女超球隊叫我去試腳，根據中國足協條例，佢哋可以簽一名香港或澳門的球員。我諗試腳兩三個星期啫，唔需要決定住。於是抱住體驗職業球員嘅心態，跟浙江隊去昆明集訓。球隊也有意思邀請加盟。是否往中超展開正式的職業足球? 一直在腦海中盤旋著。」
日與夜都是足球，就因為這一刻充滿喜悅與肯定
「對球員來說踢職業賽是一個夢，而且是中超。但這兩年我在 fitness 健美方面已經建立了事業基礎，有成績，考取了教練牌有一班穩定嘅學生 ，一下子要放低，學生要轉俾別的教練或流失。」
「加上我兩隻腳做咗四次手術，斷過韌帶半月板，要衡量我會唔會 handle 到? 好多考慮，我問自己如果唔去嘅話會唔會後悔? 我答會，最後夢大個天。」
「雖然中超給我的待遇不足彌補我在 fitness 的收入。不過我有一個發左好耐嘅夢，一定要去圓，我唔想後悔。」好鍾意呢句，從錄音檔中翻聽了幾次，覺得好襯那個叫「巴西」的女孩。
少年揚起臉龐
前往他的月亮
人們笑他狂妄
人怎可不一樣
(周深 – 「借過一下」)
當 Iris 決定北闖之際，上天總喜歡讓劇情來個急轉彎，踫巧出年2025是全運會，球隊不能派非本省球員上陣，省政府想做好球隊成績，不想把資源放在一個不能上場的球員身上，所以剎停簽約。其後雖然球隊再度邀請，Iris 也提早與華歷簡奴解約，但最終也因一些狀況未能簽約，與中超擦身而過。都話左上天有衪的劇本和通告，我哋只能跟，冇得自編自導。
「我係昆明試腳時有好大嘅感受，內地球員好細個開始踢波，唔係讀好多書，好單純，教練講乜佢哋就寫低乜，好似一塊海綿咁全部吸晒，好聽話，但冇自己分析，唔知係唔係適合自己。當你日日係咁踢，你嘅技術唔會差，但唔代表你有個腦。」
「我係球場上優勝嘅地方係個腦。我有足球sense，球場上我個腦係轉得快，識得變通，呢個係我嘅優點。」一點也不覺得 Iris 在吹噓認叻，反而欣賞她對自己的肯定，和識得發揮自己的優勢，這才配稱叻女!
「佢哋喜歡香港球員，就係鍾意香港球員個腦。」都話香港運動員唔係垃圾!
巴西，用腦嘅事情就橫傳俾你
兩場記到今天的賽事
Iris 提起2016東亞盃外圍賽在香港面對亞洲一姐南韓隊，港女足慘吞14粒光蛋，「你果時有乜嘢感覺?」知，屬低能問題系列。
「其實冇乜感覺，只係成日諗幾時完，港隊係國際賽好多時都係大比數輸波。」
「果場係我第一次爭取到任正選港隊，我踢後衛，擋得一球就一球，大家都係咁嘅心態。」對，弱者應該有弱者訂的 KPI。
雖然輸0：14，女足沒有被打沉，舉手不是投降，是感謝來打氣的球迷，因為他們也不離不棄
「在場球迷有乜嘢反應?」
「又OK喎，佢哋覺得唔緊要，下次再嚟過啦。我覺得男球迷會比較唔OK，因為佢哋唔係好瞭解女足世界，女足好多時就係咁踢。」
「我哋下一次對南韓時只係輸0比5。」Yeah，達 KPI!
「另一場是2107/18亞洲杯在北韓踢，北韓喎，大家未踢先興奮。帶啲乜嘢去都會有管制，關於美國嘅嘢一定唔得。電腦唔可以有一些可能涉及侮辱北韓嘅嘢，佢哋真係會開電腦 check file。」
「香港同組有南、北韓同烏茲別克，只能有一隊出線，大家都知是南、北韓之爭。對北韓時時見到球場坐滿了3萬球迷，覺得自己踢緊英超咁有氣氛。其實佢哋係盡公民責任嚟睇波。我哋當然俾人噓到暈。但突然聽到有廣東話叫我哋加油，原來遇啱北韓開放番跑馬拉松，有香港跑手知道港女足比賽，專誠嚟捧場打氣，真係好給力好滾動。」香港球迷絕對優秀，是世界級。
能夠在北韓球場見到香港球迷，超夢幻同滾動
「但當我哋對南韓時，觀眾卻熱烈捧我哋場，每清一次進攻都有熱烈掌聲。有一樣好特別嘅現象，就是球迷全都是男人，據聞淨系男人先可以睇波，佢哋都係著住一式一樣嘅大褸，全部攞住打氣捧捧，好整齊有紀律，好體驗到什麼是國民教育。」
7月14日國際友宜賽香港女足對印尼女足，Iris有份落場，她邀請我同 May 姐觀賞，滂沱大雨中香港勝印尼 4:1 (你冇睇錯)，香港的球員和球迷同樣熱血澎湃
足球與健美，當大婆遇上小三
「點解踢踢下波會去玩健美?」
「都係鴨仔帶我入呢個圈。」
[小檔案，鴨仔王君萍 (Epsilon) 是資深星級 fitness 女教練，行內無人不識，學生多是藝人、名人及專業人士，連續多年贏得香港及亞洲女子健美冠軍，2013更獲國際健美健身邀請賽 (49公斤以上) 冠軍，曾於於大台《沒女大翻身》節目擔任魔鬼教練。鴨仔透過跑班同學找我訪問 Iris，訪問當天鴨仔也特意前來支持和一齊吹水。]
鴨仔 (右) 是健美界的星星，具有分析力和視野，Iris有幸遇上這位伯樂和老細
「我好羨慕好欣賞一個好靚嘅身形，好想嘗試下自己可唔可以做到。可能有運動員底，我第二次玩比賽已經攞獎。」
「我唔係玩好大隻手瓜起果啲古典健美，我係玩 sport model，都要有肌肉，但著重線條美同成個身體比例。」
嘩好靚! 都話男人膚淺
「健美比賽好決定於你上到個台可唔可以展示到美態，要令 muscle 線條出到嚟。」鴨仔在旁也補充了不少，我忙點頭扮明。
「所以健美界有個講法，你上到台就當你贏。」
我即刻加句: 「跑界都有個講法，你出到門就當你贏。」雖然唔同運動界別，但同一心理關口。
「我有幫港隊 U16 同 U19 有做體能教練，我係踼波出身，又了解女仔身體情況，好知 fitness 點幫到女足，有時會因某一啲肌肉用得唔好，所以踢唔出效果，單純教波未必幫到。而且有啲動作佢哋唔係咁想俾男教練掂到。」
「不過玩健美同踢波有衝突位，健美比賽前要減碳 cut diet，但踢波要食得夠。所以玩完健美比賽，要時間去 recove r先可以去返足球場。」
「有冇諗過放低足球，專心去發展自己嘅健美事業?」
「我已經去到一個 happy football 階段，呢兩年我都係兩邊遊走，足球曾經露出一點曙光。係 fitness 呢條路好多人幫過我，好感恩遇到兩位好好嘅伯樂，如果貿貿然咁樣走左，學生點呢?之前個月有好多掙扎。」
「其實我唔會放低 fitness，我而家31歲，足球生命唔會好長， fitness 仍然會係我長遠發展之路。而且好慶幸有一些學生好愛錫我，願意上我嘅 online course。我係西班牙時，佢哋都好用心上堂，唔會想掉低佢哋或令佢哋身體差左。」道理是有優秀的教練，才有優秀的學生。
彩蛋 – 我有啲唔同咩？
「你點睇自己係中巴混血兒嘅身份?」
「唔鐘意。」Iris好決絕的回應。
「好多人覺得混血兒會好靚女，但我唔覺得自己係囉。」我相信讀者不會同意 Iris。
「 我細個成日俾人覺得唔係咁相同，你知小朋友把口又唔收，會講一啲令你唔開心嘅說話，有啲話我係阿差，當我係巴基斯坦人。我完全唔覺得混血有乜嘢好處，其實我覺得自己個樣同佢哋冇乜唔同啫。」objection。
「不過後來入左 fitness 行業，情況又有些轉變，因為你係混血兒好似特別吃香，可能佢哋都想搵外國人教，我可以扮到，仲識講極之流利廣東話添。」Iris 甜笑。
Iris 深邃的眼神，挺直的鼻樑，陽光的膚色，隱現南美輪廓，散發自信掘強。這位追夢的女孩，真係有啲唔同我哋。
真係有啲唔同，好少有咁大個牛角包
The post 不要被樓底限制天花線 | 踢西乙、玩健美的港女足郭靖雯 (巴西) appeared first on Fitz 運動平台.