森美近年屢遭網民批評做電台節目時，態度顯得愈來愈「老屎忽」、不讓DJ後輩發表意見、喜歡認叻以及經常於節目中分享「內容農場」的報導等。近日森美作客「熊仔頭」的YouTube頻道受訪，回應網民負評：「佢哋所講嘅嘢全部都係啱嘅！」又表示自己的確經常看「內容農場」的報道，更曾被囝囝一句寸爆。
森美表示自己有上「連登討論區」的習慣，亦都知道自己不時被網民批評，又分享自己看「內容農場」的報導其實都是為了做電台節目，不過他就曾被兒子寸爆：「我成日都講啲Content farm（內容農場）嘅嘢，有個人窒我，我話我近排睇咗個研究，關於醫學係咁樣嘅……跟住嗰個人同我講：『你唔係睇咗個研究，你係睇咗個研究嘅報導啫。』我望一望佢……咁樣話老竇嘅你。」森美解釋自己從事媒體工作，看報導就夠了，不過其實他也有先分析及過濾再分享給聽眾。
另外，森美又表示自己並非叻仔，而是認叻。他坦言其實每次工作他都做了很多事前準備，他亦自知短處，記憶力差、轉數及邏輯上亦不出色，「我係扮叻仔，大部份人係鍾意聽你冇做過任何功課，然後考到好成績，大家都想搵到一啲不勞而獲嘅捷徑，呢個係我哋嘅天性。所以大部份人都係想睇到一個叻仔，多過一個勤力仔。」至於在節目中，與小儀分成上、下把做主持，令外界認為他處處欺負小儀，其實都是他的招數之一，為的是令節目更受歡迎。
森美分享入行做DJ幾年後，開始感到悶，而為了令節目更受歡迎，即使知道做欺負別人的角色會引來很多人討厭亦不要緊。他更曾因太有勝負欲於節目中與小儀爭論，導致對方結束節目後爆喊，森美反省過後作出改善，他坦言做上把的形象當中的確包含了自己的真性情：「呢個唔係假，我都係鍾意認叻、也文也武，我真係咁嘅！只不過係點解我要展露呢個形象出嚟，因為做自己係比較舒服。劉德華都有人唔鍾意、張學友都有人覺得佢唱歌唔好聽、周星馳都有人話佢唔好笑……你無辦法取悅晒所有人，到最後可能係你做返自己有人鍾意你呢！」
森美於節目中與「熊仔頭」對談，感覺到對方似乎有情緒問題，對方亦坦言即將放長假沈澱自己，情緒上的確到了臨界點。森美分享自己早年發現患抑鬱症的經歷，表示自己於創作上遇到瓶頸，覺得寫甚麼都不再好笑，又經常只記住自己做錯的事，生活變得不快樂。森美表示即使現時對於病情已可輕鬆地作分享，但其實仍然未痊癒，「我哋好多時會做一樣嘢令自己開心，其實實際上你開心，你做乜嘢都開心。我抑鬱嘅時候就係覺得做乜嘢都唔快樂，就係因為我唔懂得快樂。」而現在森美時時都告訴自己：「我係快樂嘅，做咩都快樂，快樂係一個選取嚟咋嘛。」
至於曾被玄學家批過有10年好運的他，現在思考何謂好運，森美亦都有自己一番見解。他分享早年參演過一部劇集，但收視一般，他觀賞播出時仍看得很開心：「嗰件事就算大家覺得好差，而你都感覺到嗰樣嘢係好嘅時候，你就係最好運嘅時候。你懂得欣賞自己人生嗰一刻，你就係行緊運。」最後，他亦鼓勵「熊仔頭」可以做自己，不要放棄自己的創作。
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ