加拿大36年後再次登上世界盃決賽週舞台，遺憾以1比0落敗予比利時。
國際排名第二嘅比利時賽前都係睇高一線，縱使前鋒用上巴舒亞伊，喺佢後面仍然有迪布尼作進攻上嘅引擎，因此加拿大今日對比利時被球迷揶揄為以卵擊石，然而今日加拿大3-4-2-1陣式善用兩邊出擊，倚靠邊線拉闊空間傳中，9分鐘就有對手卡拉斯高(Yannick Carrasco)犯手球輸十二碼，加拿大王牌艾方素戴維斯(Alphonso Davies)主射十二碼，但被門將古爾圖斯救出。
廣告（請繼續閱讀本文）
斷送黃金機會嘅加拿大繼續進攻，雖然比利時偶有反擊，但後防嘅精準攔截亦能夠阻止，不過臨完半場前44分鐘艾特韋列特(Toby Alderweireld)後場長傳，巴舒亞伊(Michy Batshuayi)禁區內接應起腳破門，比利時上半場領先一比零。
下半場比利時加強防守換入愛華頓中場安拿拿同左翼衛梅利爾，但加拿大嘅攻門依然一浪接一浪，然而全場22次起腳只有3次中龍，即使兩邊大量傳中，前鋒位置不論係莊拿芬大衛(Jonathan David)定係拉連(Cyle Larin)嘅頭鎚攻門都係非常一般，結果壓制對手嘅加拿大以1比0落敗，結束第一場重返世界盃之旅，並且成為自1978年後第一支球隊有20次射門同十二碼機會但零入球嘅球隊。
廣告（請繼續閱讀本文）
▼ Follow 足球港場頻道
Instagram: https://www.instagram.com/footballarena_hk/