廣告（請繼續閱讀本文）
【19:59】新增警方回應
廣告（請繼續閱讀本文）
一部警車周三晚8點左右沿大圍富健街慢線，向仁安醫院方向行駛，但行行下去到隆亨邨對出突然打死火燈，之後就抽頭cut向右邊快線打算U-turn掉頭。咁啱有部七人車沿快線駛到，差啲就俾部警車攔腰撞到左邊車身，好彩七人車避過咗，但司機之後落車就大鬧揸車嗰位警察：「你點揸車㗎？你點可以咁樣揸車？」
目擊者陳小姐當時都揸車向同一方向行駛，佢向《蘋果》提供車cam片，話佢以為部警車打死火燈停車，估唔到係cut線U-turn，仲話自己見到咁都「嘩」咗聲，覺得當時揸車嗰位警察咁樣做好唔啱，未睇清楚就cut線U-turn似乎係危險駕駛添。
陳小姐講述事發時好彩部七人車避得開部警車，如果唔係實撞車。陳小姐當時見七人車司機落車走向警車，於是攪低車窗，聽到個七人車司機大鬧揸車嗰個警員，仲話一家大細喺七人車上㗎。
廣告（請繼續閱讀本文）
當時七人車上真係成車人仲有細路，而部警車就有兩個警員，其中揸車嗰個警員首先落車，陳小姐話見到嗰個警員俾七人車司機鬧都顯得有啲理虧，初時唔出聲，隔咗一陣先話自己係安全情況下轉出。陳小姐話聽到個警員咁講都呆咗，覺得直情係睜大眼講大話。事後陳小姐話為咗還七人車司機一個公道，所以就向《蘋果》爆片。
警方就事件表示，昨晚約8時04分接獲一宗999報案中心求助個案，警員前往現場處理，又稱會進一步了解事件，如有需要會作出跟進。
你敢爆，我敢獎！ 立即WhatsApp《蘋果》24小時爆相爆片熱線或致電：63836568
乜 Tung Tung 啲差佬應該萬能嘅，唔應該有任何出錯嘅機會，強烈要求機械人取代所有政府公職人員🤫🤫🤫
2018年10月04日13:33
顯示全部