《全民造星3》進行得如火如荼，除了最後十強名單漏出掀起熱話外，新一輪比賽評判之一的導演黃真真更受到猛烈抨擊，全因她在過去幾集被觀眾覺得偏私由彭秀慧做導師的B組，即使其餘四位評判都認為A組表現較好，黃真真的一票都堅持畀B組。結果黃真真成為網上討論區的大紅人，被《全民造星3》一班鐵粉瘋狂圍插，幫她起花名叫「藍假假」，指她雙重標準大細超、唔識嘢冇品味，甚至被質疑根本唔夠班做評判。
撰文：東方新地 圖片：電視圖片截圖、黃真真IG、林二汶IG、彭秀慧IG及林奕匡IG
《全民造星3》進行即時淘汰
ViuTV偶像育成真人騷《全民造星3》日前展開30強小組對決，今輪有全新淘汰形式，比賽開始前，導師林二汶(A組)和彭秀慧(B組)各自交出一份死亡名單，落敗一方會即時淘汰死亡名單順位第一的成員，操生死權的當然是五位評判，包括有導演黃真真、歌手林奕匡與許廷鏗，商台DJ朱薰及著名舞台劇演員邵美君。兩組劇鬥各有支持者，估唔到評判都有自己的喜好，而黃真真就非常明顯地連續幾集都發表其獨特見解，亦因此受到非議。
《全民造星3》評判意見分歧
黃真真向來敢言敢行，今次做《全民造星3》評判繼續好寸嘴，首回合AB兩隊都派女團出戰，B組先出場，五位參加者表演唱歌，畀意見時只有黃真真盲目狂讚，指出她們很投入，能表現出各人的特色，之後到A組的性感演出令全場氣氛升溫，四女以貼身舞衣登場，大騷長腿，甫出場已經氣勢逼人，其中Mischa(葉巧琳)一開口就展示實力唱功，令在等候區的參加者、花姐和導師都連連驚呼，讚口不絕。到評判畀意見時，黃真真竟認為Team A的表演過於賣弄性感，只是著重自己的表現，予人鬆散感覺，欠缺連貫性，但許廷鏗就反駁指她們的性感表演成功吸引到他，他更笑言︰「佢哋行埋嚟，我忍唔住咬唇，都明白黃真真可能覺得太賣弄性感，但呢招對我work嘅！」其他幾位評判都一致好評，只要黃真真唔buy，最後A組以4比1勝出這個回合。
黃真真被起花名
到第二回合，黃真真繼續吹捧B組，與其他評判唱反調，結果一樣只有她的一票投畀B組，網民連日在網上討論區瘋狂討論黃真真對AB兩組有雙重準則，有人說不知道黃真真是誰？唔明點解佢有資格坐於評判席上，更有人指她與彭秀慧是好友，所以完全偏私B組，網民愈鬧愈上火，甚至幫黃真真起了個花名叫「藍假假」，因為她只懂按B組的藍燈。其實有傳ViuTV早已寫好劇本，評判只是幫手製造話題炒起《全民造星3》，網民如此肉緊，證明《全民造星3》都幾成功。