36歲張韋怡入行12年未能上位 奉子成婚做少奶千呎豪宅曝光

戲如人生，有陣時又未必人生如戲。好似張韋怡咁，入行十二年一直做妹仔、師奶、sales 妹、護士仔等四線角色，演藝事業未有長進過，不過現實中晨早身家已經暴漲何止十倍！

撰文、圖片：東方新地

張韋怡奉子成婚做少奶

張韋怡由早年初入行住幾百呎旺角蝸居，到帶埋父母搬去九龍城千呎唐樓，至14年奉子成婚嫁畀經營家族生意嘅 Michael Poon 後，即刻飛上枝頭，由九龍城搬到九龍塘，講緊屋企已經有八千呎面積、五層樓連私家𨋢、養住五個工人加兩個司機加一個看護，生活豪過晒全台當家花旦！

懶理姑仔陰毒 入住千呎豪宅

去年中同姑仔喺社交平台互相數臭，張韋怡鬧姑仔險毒又無聊，姑仔就話張韋怡貪錢心地差，好彩最後都有老公支持呵番，張韋怡繼續晒錶晒袋晒恩愛，住厭咗九龍塘八千呎巨宅最近仲搬埋屋轉吓新環境。今次冇私家𨋢冇幾層樓，實用空間睇落都細咗，不過又雲石又假天花又有貴價傢俬，酒店式裝修絕對落重本，重點係居高臨下落地玻璃對住個無敵維港靚海景，呢樣嘢又的確係八千呎九龍塘巨宅畀唔到佢！