提到超級食物，好多人都會講羽衣甘藍，不過隨住時代變遷，羽衣甘藍已經跌出超級食物十大，今年要改食其他嘢喇！
椰子產品
椰子曾經係超級食物嘅始祖，佢可以演化成唔同食材，不過有唔少營養師認為椰子油係毒藥多過超級食物，其實椰子油有殺菌功效，選用「特級冷壓初榨」嘅椰子油相對健康。
外國近年都積極推廣素食乳酪，椰子就成為乳酪嘅重要成分。
另外椰子水係超低卡飲品，促進消化吸收有助減肥，加上椰子水高鉀可以去水腫，的確有資格做超級食物。
發酵食品
近年大家都好關注腸道健康，發酵食品順理成章成為超級食物，而乳酪就係代表食品，同時有排毒及抗炎功能嘅食物都越來越受歡迎。
營養師預計來年乳酪、克菲爾、紅茶菌等等益生菌會大行其道。
牛油果
牛油果含有20種維他命及多種礦物質，加上佢擁有較多不飽和脂肪及纖維，對減肥人士而言依然係健康食物，烹調方法又多元化，難怪係屹立不倒嘅超級食物！
籽
唔少人都聽過亞麻籽同葵花籽，近年奇亞籽﹑大麻籽同南瓜籽都逐漸受歡迎，因為佢哋有豐富蛋白質、礦物質、膳食纖維、不飽和脂肪酸及抗氧化物質等等，雖然味道唔係太吸引，但加落其他食材好似乳酪咁一齊食，都係一個唔錯嘅選擇。
異國水果
巴西莓同枸杞莓多數係早餐食，前者嘅Acai Bowl早年更掀起熱潮，個個都話要食佢減肥。
事實上呢類異國水果甜得嚟含有豐富不飽和脂肪酸及抗氧化物質，仲有保持腸道暢順嘅纖維，每個禮拜食一食清腸胃都好呀。
藍莓
成日聽到藍莓素，呢款超級食物同其他超級食物最大分別，就係明目！藍莓有豐富植化素，可以抗氧化、抗發炎，增強抵抗力，對學生而言，藍莓可以增強記憶力；對女士而言，藍莓可以減緩老化，佢更有助抗癌抗心臟病，加上味道鮮甜，顏色吸引，難怪係最受歡迎嘅超級食物之一！
紅菜頭
紅菜頭含有豐富維他命及礦物質，包括維他命A、B、C、鐵、鈣、鎂、鋅、鉀、銅、 錳、磷等；而且含有豐富纖維、可以預防心臟疾病。
雖然味道唔太討好，但紅菜頭汁有助降血壓、減低心臟病及中風嘅風險，飲500ml紅菜頭汁可以喺6小時內降低血壓，男女老幼都適合。
原始穀物
原始穀物（ancient grains）同其他穀物最大嘅分別就係冇經過大量基因改良以及雜交嘅穀物，盡量保持穀物原始狀態，藜麥就係當中嘅表表者。而紅藜麥嘅膳食纖維係燕麥嘅3倍，鈣質係牛奶嘅2.5倍，鐵係牛肉嘅1.9 倍，長期食用有助預防心血管疾病、抑制動脈硬化、降低膽固醇、抗老化等等，係減肥人士嘅恩物！
除咗藜麥之外，呢兩年Farro小麥﹑苔麩﹑高粱﹑莧米等等都成為唔少人代替米飯﹑意粉嘅食材！
堅果
堅果類有不飽和脂肪及ω−3脂肪酸，仲有鎂、鉀等礦物質，係減肥人士嘅零食，提供到足夠嘅飽肚感之餘，適量食用有助預防、降低心血管疾病嘅發生，又可以改善便祕，不過要記得要買原味，因為烤過或加糖加鹽版本多吃無益。
非乳製品
麥奶﹑杏仁奶等等低卡低脂又適合素食人士，現時都越嚟越多人用佢哋代替牛奶，核桃奶同堅果奶都漸漸受歡迎，乳糖不耐症嘅人都可以飲用㗎！
新一年大家不妨參考下，慢慢加入超級食物到你的餐單，改善飲食模式，身體都會跟住更健康！
撰文：沙拉
