演戲做人阿媽幾十年嘅吳浣儀，日前接受訪問自爆當年因為戀愛大過天，上緊位竟然劈炮唔續約，寧願走去拍拖然後嫁人，仲生咗四個仔女。後來老公患病，浣儀姐要拍劇養家，喺最艱難嘅日子好彩有好姊妹鮑姐(鮑起靜)、羅蘭姐借錢畀佢度難關，得人恩果千年記，佢到今時今日都好感恩。
撰文：東方新地
後生喜愛夜蒲
吳浣儀日前應好友苑瓊丹邀請，亮相香港開電視節目《開工大吉77》訪問，暢談多年演藝生涯嘅點滴，浣儀姐話自己當年係夜之女「喜愛夜蒲」，更即席示範舞姿：「苑仔話我嗰樣老老實實，但佢唔了解後生嘅我，當年我都係會周圍玩，收工要去『蒲』㗎，去飲嘢、跳舞之類，跳得好勁添，我係鍾意去玩！年青時有人讚我幾靚，加上讀書時有做過舞台劇，覺得自己鍾意做戲，見到電視賣廣告，又冇咩做咪試吓考訓練班，諗住唔得㗎，點知又過晒關，所以話真係整定嘅！」
浣儀姐喺73年參加無綫藝員訓練班入行，入行初期都係做二打六閒角扮茶客，翌年就被選中飾演《朱門怨》嘅三少奶迅速走紅，大受力捧，星途一帆風順：「因為我以前又曳又惡死，所以角色都叫做番我自己，好自然就發揮到囉！去到75年我因為『嬲』而離開電視台， 當年都算年輕，做咗兩年公司突然搵你做啲閒角，加上唔小心NG就會有說話聽『唉，冇船過海啦！』，而我又剛開始拍拖，咁咪唔鬼做囉！」她表示愛情成為離巢動力，否則唔會太衝動拒續約：「當年另一半都冇話養起我，但拍極都係閒角，由朝等到晚都未埋位，阻住我拍拖嘛！總之都係任性啦！做嘢冇諗過後果，跟住就轉咗去佳視，點知最後執埋，咁我咪走去結婚囉！」
老公病逝孭起頭家
當年浣儀姐24歲就下嫁經營旅行社嘅老公，其後生咗三女一子，一家六口幸福滿滿，佢亦樂於做少奶奶照顧仔女，直至87年佢重返無綫拍《季節》，之後又因亞視高薪挖角再離巢，不過好景不常，浣儀姐老公患上肺癌，為咗醫病耗盡所有積蓄，可惜到05年都係撐唔住病逝。嗰段期間浣儀姐一邊照顧家人，另一邊廂拍劇養家，成為人生最艱辛的日子：「當時真係唔做唔得，仲要問鮑姐、羅蘭姐借錢過難關，要拍劇還債！不過我好得意，自身嘅事唔會點喊，要面對囉！後來丈夫過身，好在一直都有戲拍可以養家，當時好忙都冇時間理啲子女，但好在佢地依家都好OK！」
近期浣儀姐因為疫情而閉關，但佢仍期待好劇本降臨：「依家有戲拍咪拍囉，不過我係冇攞獎命㗎，當年都恨過吓想攞，依家都想嘅！但呢啲都係整定，最緊要開開心心、身體健康，睇開啲唔好轉牛角尖囉。」拍攝期間臨近苑仔生日，浣儀姐專程買蛋糕慶祝，但反被苑仔「嫌棄」：「我叫浣儀唔好客氣啦，唔好買蛋糕啦，直接封利是畀我算啦，點知佢話我俗氣！又大一歲啦，唔好問我幾大年紀啦，我地都係第一次慶祝生日，非常難得！」已經65歲嘅浣儀姐，依家仔大女大其實可以享清福，不過佢仍然好鍾意演戲，所以未有退休大計。