紅館開騷申請11次最終因肺炎再撻Q！52歲陳小春專心做奶爸

結婚十年，大仔Jasper（陳胤捷）下月滿七歲，應采兒、陳小春終於成功追多個，上周五（5月29日），36歲應采兒為老公陳小春添多個小兒子，並改乳名「HoHo 」，三口變四口之家，Jasper正式當哥哥。屋企多個「小Jasper 」，小春掩不住喜悅心情，受訪時揚言細仔樣子較似老婆，又表示在產房拍下不少片留念。家有喜事喜上眉梢，但原來疫情關係，令小春等了十七年的紅館騷夢碎，一直恨再開紅館騷的他，入紙申請十一次才獲批出檔期，卻被新冠肺炎打殘，四場演唱會全部取消，幸好有小兒子來臨彌補失落，現時留家專心做奶爸，悉心照顧家中一大兩細先最緊要，紅館開騷心願惟有再等！

撰文、圖片：東方新地

陳小春細囝出世專心做奶爸

52歲陳小春近日再當爸爸，老婆應采兒為他開刀誕下二仔，日前小春到養和醫院探剛出世的兒子及老婆，就興奮表示已幫細仔改了乳名「HoHo 」，寓意甚麼都好好，半百年紀再添丁，小春確實好興奮。今年同老婆剛慶祝完錫婚紀念，大兒子Jasper快滿七歲迎來新生命，一切都是夫妻計劃之內。據知情者透露：「丁丁（應采兒）同小春本來都想早啲追多個，等Jasper可以有個伴一齊玩，年紀差距唔使咁大，但佢兩公婆錫到個仔燶，生B計劃一定要過Jasper 一關先行動，早兩年Jasper 仲未接受到有細佬妹，佢話驚細佬妹會搶走佢啲玩具，直至上年， Jasper 忽然答應話肯要細佬妹，丁丁同小春先敢開Turbo造人，雖然佢哋好想追個女，但丁丁唔想再做高齡產婦，兩公婆已決定生完呢胎就收爐！」

Jasper妒忌細佬

去年12月，小春選擇在台灣開騷時在台上宣布老婆再陀B消息，當時坐在台下睇騷的Jasper ，興奮得手舞足蹈，萌樣超級可愛，對多個細佬似乎完全冇抗拒，的確令小春夫婦放心晒；不過小兒子出世後，原來Jasper對多個細佬仍不免妒忌。小春受訪時直言：「Jasper 尋日探咗細佬好開心，但今朝瞓醒佢就有啲唔舒服嘅感覺，今晚我返去都要氹吓佢，其實之前佢問過我， Jealous係乜嚟，問我最後一次Jealous 係點樣，最初我都唔識點答，後尾諗到同佢講『Jealous is no big deal 』，佢聽完都話OK！不過剛才同佢視頻，見佢都唔太開心，以前佢好多嘢講，依家想講又講唔出咁！我都應承佢，返去陪佢踩單車同睇波，佢先開心番！」

入紙紅館十一次最終撻Q

老婆生B辛苦，小春亦全天候照顧家中一大兩細，但原來今年他本有望完成開紅館騷心願，更已獲批出三月檔期，一心以為雙喜臨門！誰知新冠肺炎打殘演唱會，最終個唱撻Q。據知情者透露：「自從03年開過兩場紅館騷之後，小春一直都好恨喺香港再開騷，眼見好兄弟伊健近年密密開騷，佢就更加心癢癢，不過，單係呢兩年幾以嚟，佢已經入紙申請紅館檔期十一次，本來早就心淡，直至今年三月紅館先批咗九日檔期畀佢，佢仲計劃好做四場演唱會，叫定班『古惑佬』兄弟撐場，點知人算不如天算，新冠肺炎突然殺到，佢個騷亦因此開唔成！」

生仔前約友鋸扒硬食老公二手煙

紅館開騷無望，小春近日專心陪老婆大人應采兒湊仔，向來錫老婆的他，見老婆陀B辛苦，更加廿四孝服侍周到，湊仔煲湯一腳踢慰妻，生B前應采兒還在社交網晒出老公為她煲的谷奶湯水，大讚好味公開晒幸福。而應采兒入院生仔前，還先和朋友鋸扒歎餐好，日前（5月25日）傍晚，小春夫婦到中環會合友人吃西餐，邊食邊傾兩個幾鐘才離開，當晚約九時許，小春跟友人先落樓扯煙，接著落樓的應采兒，飯後即戴回口罩防疫措施相當謹慎，即使小春和友人食住煙，她仍百無禁忌圍埋傾偈，臨盆在即的她不時摸住巨肚，眾人企街吹水十分鐘，她才盡興跟小春乘七人車返回大埔寓所。而夫妻約友人鋸扒當日，小春下午先做慈父安撫大仔Jasper ，見佢一支公帶Jasper外出吃漢堡包，父子邊食邊傾，但見Jasper 不時扁嘴，看來真如小春所言，他仍未適應做哥哥心情！睇嚟小春做奶爸湊細仔之餘，真係要加大力度氹番Jasper 先得！