每次一班人聚會，CONY都會第一時間諗起打邊爐。雖然而家係夏天，但打邊爐一早成為咗一年四季都可享受嘅美食，而且近年出現唔少火鍋外送服務，有台式火鍋、雞煲、海鮮火鍋等超多選擇。今次等CONY為大家精選6間設有火鍋外送嘅餐廳及網店，全部各有特色，等你想同朋友、家人在家中聚會時，都可以隨時因應不同人嘅口味落order！
1. 台式火鍋+創意配料
「火鍋撚」係香港其中一間最早主打台式火鍋嘅餐廳。而家仲設有火鍋外送網站，大家可以參考網上嘅運費計算，然後根據送貨地點，揀選運費最平嘅分店（旺角、中環或西環）預訂食物，喺送貨或自取時間3小時前下單即可，而且不設最低消費。咪話CONY唔提大家，記得嗌招牌「蜂巢豆腐白湯鍋」及「祖傳秘製麻辣鍋」，同埋其他創新火鍋配料呀！
火鍋撚
網址：https://www.onondeliver.com/pages/hotpotland
2. 親民足料港式火鍋
「滾得棧」係其中一間CONY最常去嘅火鍋店，佢主打港式火鍋，湯底足料，食材亦夠新鮮，而且價錢親民。佢早前推出多款外賣套餐，$588起已包括外送到指定地區，如果自取嘅話更可以減$100，而即日落單最快可於一小時送達。不過佢哋不設網站，需於Facebook專頁查看餐牌，然後再電話落單。
滾得棧
網址：https://www.facebook.com/hotinapot.YMT
3. 人氣雞煲店限時$0優惠
鍾意食雞煲嘅朋友千祈唔可以錯過「陸陸雞煲」，佢哋嘅雞煲唔止香辣惹味，夠晒濃郁，雞件仲好嫩滑。至於佢哋嘅外送服務都運行得相當完善，設有網站方便落單，雞煲可以自選辣度，由BB辣至大辣任君選擇，仲有唔少火鍋配料可以加購。另外值得留意嘅係餐廳會不時推出「$0雞煲外送優惠」，份量為半隻雞，足夠2至3人享用。提提大家，網上預訂外送服務最低消費為$500，並另按地區收取運費。
陸陸雞煲
網址：https://www.66hotpot.com/
4. 款式齊全 自設工場
接住落嚟介紹嘅「鮮物」唔係實體火鍋店，而係主打不同食物外送服務嘅網店。佢哋於柴灣設有工場，其中火鍋外送較為人熟悉，設有多款湯底、海鮮等火鍋食材，由單點、指定套餐及自選套餐任君選擇，當中較受歡迎嘅有「老火湯海鮮火鍋套餐」及「椰子雞煲套餐」。佢哋近日仲推出7周年優惠，預訂指定套餐減$150，仲送超市禮券。至於運費方面，港島地區消費滿$500起免運費，九龍或新界地區需加$60運費，於每晚10點前下單可於翌日送貨。
5. 每日新鮮入手靚海鮮
有唔少人都鍾意食海鮮，不過未必個個識清洗處理。位於香港仔、家族式經營嘅「漁花海鮮批發」，第二代加入後看準市場，開設包洗包劏嘅海鮮外送網店。店主每朝6點都會去香港仔魚類批發市場入貨，而除咗本地靚海鮮，佢哋仲有唔少飛機貨，例如阿拉斯加長腳蟹、時令日本海膽、拖羅魚碎、法國藍龍蝦等。訂購安排方面，網店每晚8點截單，買滿$1000免運費，滿$500需加$50運費。
漁花海鮮批發
網址：https://www.seafoodfloweryhk.com/
6. 主打海鮮套餐懶人包
同樣主打海鮮外送速遞嘅網店「點點鮮」擁有10多年海鮮批發經驗，為全港多間酒樓及酒店提供各類活海鮮。佢哋嘅海鮮外送以套餐為主，會按時令推出不同套餐，好似近日就推出松葉蟹海鮮盛宴。佢哋仲會不時推出早鳥優惠，提早預訂會有不同贈品或可享優惠價，唯一美中不足嘅係佢哋冇自己嘅網站，需要喺社交平台了解餐牌，再以電話落單。
