梁芷珮擲6位數同老公開旅行社！手揸4個團 有信心疫情後好快回本

39歲梁芷珮（Christy）同老公Kenneth都係旅遊愛好者，兩夫婦近年更拍住上一個做幕前一個做幕後製作旅遊節目《潮什麼》系列，更成功入屋深受一班觀眾歡迎！近日Christy同老公更決心投資6位數成立旅行社「Hipster Tour」，準備疫情一完就做導遊，帶觀眾一齊出國玩！

其實Christy由兩年前開始已經同旅行社合作，以「玩家」身分帶團飛去意大利、希臘、冰島等地旅行，當時Christy眼見反應不錯已經心郁郁想開旅行社，但考慮到自己要成日出國拍攝，所以未有認真細想，直到近年疫情關係冇得飛Christy先有時間同老公認真計劃。Christy透露去年7月已經正式獲取旅行社代理商牌照，雖然疫情關係未得出團，但手頭上已經保留了三團冰島及一團希臘，加埋有約45位團友，全部都是她的粉絲，仲話疫情一完就可以即時出發。

Christy又指之前如果出國旅行回港需要隔離7日時，曾試水溫問過粉絲會否有興趣報團，當時有30多人支持，到之後要隔離14日都有3、4人表示想報團，不過考慮到自己要出發拍《潮什麼》就放棄了。Christy有信心之後成團的話好快就會回本，又強調帶團是自己同老公的意願，當是一個長久職業，又指一來可以拍攝《潮什麼》，二來可以帶粉絲去玩，雖然現時未能出團，但有信心飛得返之後會做到冇停手。