陳奕迅領悟塵歸塵土歸土 「做人唔好睇到自己咁大」

陳奕迅今年初完成27 場個人演唱會後，飛到日本北海道放假一個月，之後即推出新歌《塵大師》。Eason笑言，冰天雪地中並沒有滑雪滑到會飛，反而修煉了修理吸塵機的學問，在大自然中休息，是為放鬆自己心中緊扣的結，然後收拾心情，為世界巡迴出發作準備。

《塵大師》這首歌由2020年開始籌劃，Eason：「一直慢慢做，做了三年，從來未試過可以慢慢咁做歌，最初有啲唔慣，以前一年出三隻碟，兩隻廣東一隻國語。四大天王仲癲，一年三隻碟拍十部戲。當大家可以慢一啲，又可以投入多啲落去，出來的內容可以再深層次，其實係好開心。」

由收到林家謙的曲後，Eason已經十分喜歡，想起多年來都很欣賞林海峰的詞，所以就請阿Jan為他填詞，再邀請李榮浩編曲。「阿Jan個人一啲都唔 『係咁咦」囉，好認真，歌詞、段落上下都為配合編曲調及改幾次，本來首歌冇達哥（吳孟達），因為當時達哥過身，Jan即刻又加返，作為一種默默的致敬。又畫埋個塵大師公仔畀我，等我可以出動畫版MV，真係好正，好多謝佢。」

Eason剖白未知是不是年紀漸大，心開始變得柔軟：「我係一個好抑壓的人，以前咩都死撐住，覺得咩呀，梗係輸人唔輸陣，所以咪只得黑面，或者嘻嘻哈哈畀人睇。依家人大個咗，開始好易被感動到。歌名叫《塵大師》，我做唔到大師啦，我都係人，大咩師，我只係一粒塵，好渺小。我有時都會諗，塵歸塵土歸土，有一日我都會返去化為塵，所以做人唔好睇到自己咁大，否則會變好㒼塞。我睇到一啲朋友聽歌後留言，都話今日好唔掂就爆血管，聽完首歌鬆一鬆，我就好開心，林海峰填呢首詞，都係想送畀香港人，希望大家一齊可以度過所有緊張日子，放鬆一下心情。」

經過27場演唱會，Eason直言之前一直備戰狀態拉緊的神經，終於鬆下來，但因為拉緊了這麼長的日子，像打結的繩子，上面仍有很深的摺痕，「未鬆晒，去旅行我都係為尋求大自然嘅寧靜，冇乜玩㗎，經常留喺住嗰間屋洗下碗，洗下地，邊洗地邊洗滌心靈。同埋勁呀我，學識埋修理吸塵機，又拉又剪將纏住係吸塵機上面的頭髮呀，垃圾呀，全部清晒！個一刻好有成就感，哈哈。喺旅行期間，都撞到好多人，好難話冇人認得出我，試過喺意大利山上懸崖路邊都有人認出，哈哈，所以我都化咗好多啦，有時間叫我影張相，我都會影，只係如果我趕時間，我驚我太熱情一陣影完相同人吹起上來，我就唔影囉。 」

休息過後，又再出發，4月巡迴演唱會開始，先去新加坡、馬來西亞，反應非常熱烈，7月會去台北小巨蛋，一開七場。Eason說自己回來想了一下，是否需要找健身教練訓練體能，豈料經理人撥冷水指他之前27場都沒有去過，「好好笑，我諗返又係喎，我有操過，當時都係打下波，哈哈哈。但係我都反駁佢，咁見下健身教練吹下水唔得咩，哈哈。」