今早去到茶餐廳，祝老闆蛇年生意興隆，寒暄之時有客人話觀塘又搞夜市。過年搞呢啲咁開心盛事，理應大家高興，不過佢就有啲愁眉苦臉。客人話，原來佢係上次夜市啲vendor，等咗成年都未收到數，聽聞因為主辦單位無找數，所以一眾幫手嘅 vendor都要砸過年。
香港政府喺舊年11月，預期2024香港經濟增長2.5%，但相信市民體感無咁樂觀，尤其樓價下跌，當資產價格下跌，就會影響財富效應，大家使錢意願下降，然後最終影響實體經濟，呢啲故仔睇財經分析都會經常見到。生意難做咗其實都顯而易見，撫心自問，有幾多朋友呢啲時勢喺日常消費上比舊年使多咗錢？所以生意難做下，主辦單位更加唔應該拖數。
廣告（請繼續閱讀本文）
睇返上年個夜市，根據《觀塘區議會文件第24/2024號（2024年7月4日區議會會議）》，第2點寫「觀塘民政事務處與觀塘區議會及工商聯⋯⋯舉辦仲夏夜市」，第3點寫「仲夏夜市主要由工商聯籌劃及斥資營運」。政府項目如果有拖數問題，會影響社會公信力，所以如果佢哋畀咗錢，希望可以公開澄清，等大家對政府財政同公信力感到放心，亦等大家知道真正責任人誰屬。
客人亦有講，今次個夜市啲駁電，係非常之有趣，重畀咗啲相大家睇。大家睇完都覺得有啲譁然，有啲檔口電箱電線就咁凌空掛喺帳幕支架度，甚有30年前大排檔風味，甚至將125W大電就咁分出嚟畀電，而且唔知有無做防水。睇傳媒報道，夜市不少熟食檔，熟食就會有水供應，農曆新年亦隨時有雨，所以希望政府喺賬目上清楚之餘，安全都要留意好。
敬祝蛇年各位行大運！
廣告（請繼續閱讀本文）
金缸經
註：專欄作家言論不代表本網立場
密切留意BossMind動向！立即CLS
廣告（請繼續閱讀本文）