傑志已經八年無喺正式盃賽決賽輸過波！對上一次佢哋喺決賽輸波已經係八年前嘅銀牌決賽,當時佢哋面對冤家東方。即使傑志當時有兩位西班牙兵佐迪同巴倫古素力挽狂瀾,但係都係無阻東方奪冠。當日嘅東方中場美路史拿域梅開二度之餘,喺中場表現幾乎係完美,成為當該東方氣走傑志嘅主要功臣。
-
事過景遷,今日嘅傑志已經經過多年歷練成為港超powerhouse,建立咗一種 winning mentality,喺關鍵賽事絕對唔腳軟,就算好似今屆煞科戰對理文兩度陷入險境,佢哋總有辦法捱得過去！情況就好似近年皇家馬德里喺歐聯咁,其他隊手好似無論點努力、打得幾好都好,最後都要認低威。
-
流浪已經多年無殺入任何盃賽決賽,而除咗盧均宜、林嘉緯同基藍馬「三老」之外,其他球員都相對上欠缺大賽經驗,而近日又鬧出李冠泉老師事件大傷和氣,就咁睇落星期六嘅足總盃決賽就似乎凶多吉少。不過流浪近期氣勢強到不得了,季尾聯賽連勝六場,或者佢哋嗰勢令球員信心爆棚,一鼓作氣去贏埋傑志亦唔係無可能。
廣告（請繼續閱讀本文）
▼ Follow 守拙頻道 (已授權予Line)