35歲演藝高材生何遠東入行12年 窮苦出身任勞任怨曾一日打三份工

何遠東呢個名，似熟非熟，近年憑《心理追兇》、《黃金有罪》、《降魔的》等精湛演出而成功入屋，在播出的《十八年後的終極告白》飾演「肥仔富」，外形肥嘟嘟非常親切，見到一定認得出。

撰文、圖片：東方新地

何遠東入行12年 獲獎無數演藝高材生

究竟好戲肥仔是如何煉成的？入行12年，獲獎無數嘅演藝學院高材生，曾獲《萬千星輝頒獎典禮》「飛躍進步男藝員」以及憑《降魔的》「龍貓」一角提名最佳男配角，何遠東嘅演技備受肯定。唔止拍電視劇，電影、舞台劇瓣瓣精，皆因何遠東自小就表演慾很強，且喜歡鑽研演技，曾先後以戲劇導師身份任教於家燕媽媽藝術中心、中英劇團、愛快樂劇團、北區青少年中心劇團、PIP藝術中心等等，經驗豐富。

窮苦出身任勞任怨曾一日打三份工

窮苦出身曾經為一百幾十蚊一日打三份工，捱到今時今日終於有啲成績，不過由細肥到大嘅何遠東身體狀況認真麻麻，高峰期更一度重達280磅！何遠東自爆因經常食煎炸食物，前年發現腸內有瘜肉，有次仲因為工作期間瘜肉爆裂而不斷出血，搞到要向身邊女同事借用衞生巾㖭！好在及時發現做手術
割除，如果唔係隨時惡化變成癌症就不堪設想啦！家陣食少咗啲垃圾食物兼不時做運動，三年間減咗成30磅，何遠東學會珍惜健康保持心境開朗！日前，撞見佢返電視城開工，被粉絲攔途截劫要求合照，何遠東冇托手踭仲笑容滿面，粉絲多角度影完再影佢都冇詐型，nice到爆！