政Whats噏：李柱銘被的哥爆粗指罵　逃入大廈避難

近期社會氣氛緊張並嚴重撕裂，罵戰、肢體衝突一觸即發。社會變得咁亂，「搞事四人幫」可以話有份造成，所以今日灣仔街頭就上演「搞事四人幫」嘅成員遭人粗口指罵，今次主角就係有「李漢奸」之稱嘅民主黨(白鴿黨)創黨主席李柱銘，似乎社會對佢嘅怨氣好深，難怪要急急腳走避難咁款喇！

話說今日多個團體輪流前往灣仔警察總部請願，遞交請願信後就和平散去，有部分人就走去警總對面嘅駱克道登上旅遊巴士離開，點知呢個時候就野生捕獲到李漢奸過馬路，民情立即變得洶湧，喺對面馬路都聽到媽媽聲囉。

有人高呼「漢奸李柱銘」、「大漢奸」、「走狗」等，似乎其漢奸形象已經深入民心。不過李漢奸不為所動，搞到有部分請願人士激動到走去佢面前高舉中指，需要警員協助分隔，有在場人士大嘆，打完警察轉頭要警方保護，真係衰咁話喎，仲笑李漢奸係過街老鼠添！

而李漢奸雖然成功過到馬路，同請願人士距離拉闊到一條馬路距離，但呢個時候就有架載緊客嘅的士停喺馬路中間，司機更校低車窗，將手伸出車窗外指住李漢奸，爆粗鬧「X你老X」，睇嚟李漢奸真係人人喊打。最後李漢奸要喺警員協助下，快步進入駱克道一幢大廈搭𨋢離去，相信安全去到佢嘅目的地，但門外仍有對佢不滿市民，大問李漢奸點樣對香港人負責，直指李漢奸好離譜咁話囉！

其實近期香港亂像頻生，而「搞事四人幫」多次合體亮相，好似李漢奸連同其餘三名成員，即有「漢奸黎」之稱嘅壹傳媒黎智英、「民主阿婆」前政務司司長陳方安生同香港天主教教區退休主教陳日君齊齊出動現身上月9日嘅遊行，而李漢奸更喺過去幾次大型遊行中行隊頭如同指揮咁。

另外，李柱銘畀人鬧漢奸亦唔係無的放矢，事關今年5月佢就同立法會前議員李卓人、羅冠聰等人遠赴美加，期間喺華盛頓會見美國國務卿蓬佩奧，又同美國眾議院議長佩洛西會面，而行程中多次談及《逃犯條例》修訂，實行唱衰香港，所以佢今次喺街行都畀人狙擊，絕對係自己攞嚟衰。

東網網站 : https://on.cc/

東網Facebook專頁 : https://www.facebook.com/onccnews/