51歲袁文傑騷肌輸24歲周嘉洛 疫境加操做最型大叔

69年出世、19歲入行，今年1月過埋51歲生日，「游生」袁文傑近日喜孜孜對外公布，較早前身體測試結果，顯示身體機能竟然維持在35歲，比真實年齡後生足16年！其實拍足32年戲、遊走全港大小媒體、近年再靠拍劇於無綫入屋走紅，游生皮光肉滑、高大威猛，唔使機測、目測都可以判定呢位新一代電視台不老男神保養得宜！不過袁文傑早前在《愛．回家之開心速遞》其中一集孖住「廢青安」周嘉洛的一場桑拿騷肌戲，卻輸畀近來愛上健身的後輩，對自己外型要求極高的袁文傑立即加緊操肌，就算近來新冠肺炎肆虐都無阻決心，誓要做個最有型最有款嘅大叔！

撰文、圖片：東方新地

袁文傑疫境加操保住金漆招牌

隨著《大醬園》播畢完成宣傳工作，加上電視台不少工作為配合抗疫停拍，袁文傑未有新劇開，暫時只間中為《愛．回家之開心速遞》開工，平時都以居家為主。不過停工不停操，平時有做開運動的袁文傑，近來未受疫情影響而減少運動量，反之有增無減，由過去每周兩日加至五日運動量。除了對自己要求高，袁文傑近來密密加操，原來另有內情，早前播出和周嘉洛一場焗桑拿赤膊戲，大家焦點全落在周嘉洛身上，兩男露肉，向來keep得好的袁文傑，對住個後生自己一半嘅周嘉洛亦難免比下去，知情者透露：「白白淨嘅周嘉洛以前只係打吓波行吓山，冇去健身，幾個月前先開始跟教練去操，平時收收埋埋，咁啱要拍場赤膊上身嘅桑拿戲，嗰日佢一除衫大家都嘩然，播出街立即成為話題，當日同場嘅袁文傑不時翻睇啲片段，唔甘心輸畀個後生，要保住弗足咁多年嘅金漆招牌，所以去加操，主力操胸肌 ﹗」唔贏都唔可以輸，雄性鬥心一發不可收拾！

健康日常曝露逆齡秘密

袁文傑果然有決心，日前從北角寓所出發到銅鑼灣健身室操肌，做完運動出完一身汗，以港鐵代步回到北角，然後行轉超市買餸，買的都是生果蔬菜，早餐揀麥包，食得健康又節制，汽水零食肥膩嘢？絕對係絕緣體。其實51歲袁文傑要同24歲周嘉洛比，真係要求過高，他早已是在行內出名愈活愈年輕的表表者，不時被問到個人保養秘技，袁文傑向本刊記者透露：「首先多得媽媽，在世時一個星期煲足七晚湯，可能飲得湯水多打底打得好。仲有平時飲好多清水，剃完鬚一定用保濕精華再敷面膜。同埋飲食清淡啲、少肉多菜夠營養！」唔係得把口，拍劇以外，袁文傑的確作息正常、生活又規律，近日加操，身形更弗不在話下，變筋肉人日子不遠矣！