《多功能老婆》4分鐘「遊車河」戲硬銷高鐵　惹網民反感︰超突兀

受反修訂《逃犯條例》運動影響，因為TVB的新聞報導被指不公正，所以早前就有網民發起「罷看TVB」，令TVB的收視大大受到影響，當中由楊千嬅、周柏豪及黃浩然主演的台慶劇《多功能老婆》播出兩個星期以來，反應一直麻麻，近日更有網民批評劇集不夠貼地，前晚一集劇集更利用一節長達4分鐘的「遊車河」情節疑似宣傳香港景點及高鐵好處，非常突兀。

前晚一集，其中一幕就周柏豪開車載住楊千嬅、陳煒及朱晨麗去「遊車河」，更去勻香港各區旅遊景點，包括：維港、尖沙咀等，足足遊足4分鐘，在經過高鐵站時，陳煒更驚訝表示：「嘩，高鐵站呀！我以後出差就可以直達上海、北京幾方便。」尤如植入式廣告一樣宣傳高鐵。之後經過銅鑼灣時，她們看到SOGO外面的「大電視」又指：「你睇下個電視幾大，大過戲院睇戲呀！直頭壯觀呀！香港真係好靚好靚呀！」對於劇集特意遊覽香港景點，又HARDSELL高鐵，網民都負評連連，指劇集是想向內地觀眾宣傳香港，有人更指在現今中港關係緊張的時勢宣傳高鐵，只會令大家對TVB更反感。