2019回顧／最搶眼球嘅20大立法會議員，佢哋紅過KOL！

網路至Hit立法會議員

今年喺香港地，就算幾唔識、唔想理政治嘅香港人，都避唔開依場影響全港嘅社會運動。喺依場運動入面，有一班人忽然知名度急升，人氣真係分分鐘勁過明星同香港著名KOL啊！佢哋係邊個？咪就係幫市民代議嘅立法會議員囉。不過呢，人氣高未必等於名聲好，今次就等DailyView用大數據帶大家睇吓，2019年度最廣受人討論嘅20大立法會議員有邊個，再揀10個嚟睇埋佢哋Facebook最多人留言回覆嘅兩個POST，輕輕分析吓香港網民討論佢啲乜啦！

DV小教室：網路溫度計透過《KEYPO大數據關鍵引擎》，觀測、爬梳港澳地區近萬個網站、頻道，其中包括新聞頻道、各大討論區、FB、IG以及Blog，從中取得資料樣本數，並以AI語意程式作數據分析。「網路熱度」為主題項目相關的網路posts和comments ，數值愈大代表主題項目的討論度愈高。

image source:

image source:

18 陳健波（104746筆）

陳健波係立法會功能界別（保險界）嘅議員，亦係財務委員會嘅主席。今年佢可以稱得上係「爆紅」，自香港社會運動持續至今，唔少「金句」都出自佢，好似咩「收成期」、「我收回」等等。睇返佢Facebook最熱門嗰個Post，係佢拍片講自己點睇「黃色經濟圈」，話對香港嚟講係災難，叫香港人唔好再撕裂咁話。佢嘅言論有人同意有人唔同意，正反兩面嘅網民喺個post下留言，激起一陣陣討論熱潮，各種論點百出。

image source:Facebook／陳健波-波哥

17 陳志全（107774筆）

依家好多人見到陳志全，好下意識咁覺得佢一直都係從政嘅議員，但其實佢一開始係做電台主持出身㗎！佢「慢必」依個名都係喺九○年代同快必譚得志，一齊喺商台報交通嗰時改㗎，之後仲拍住檔喺娛樂圈打滾好多年，去到2010年左右，陳志全先叫做積極參與政治活動。做過DJ又做過主持人，陳志全講嘢梗係好掂啦！佢最多人討論嘅Post就係一段發言影片，無論同意定後對嘅網民，唔少都提到佢語言表達得好好。

image source:Facebook／陳志全議員（慢必）專頁

11 蔣麗芸（238339筆）

支持蔣麗芸嘅人，話好欣賞佢行事作風夠大方、爽快；唔支持佢嘅人就話佢似潑婦，仲幫佢改個花名叫「政壇元秋」，話十足十電影《功夫》入面嗰個包租婆。今年香港社會運動持續，蔣麗芸亦都保持過往作風，喺公眾同Facebook等平台多次表達己見，佢最熱門嘅Post就係回應傳聞7月21日元朗白衫人攻擊大肚婆事件，話該女士唔係大肚，只係網民亂咁傳。不過後來又證實女士的確大肚，反俾網民諷刺成日唔Fact Check。

image source:Facebook／蔣麗芸議員

10 陳淑莊（240042筆）

陳淑莊畀人嘅感覺就係才貌兼備，身兼大律師、舞台劇演員、主持人等多個風格好唔同嘅身份，平時講嘢又快又有條理，真係睇得又Talk得啊！喺香港2019下半年開始，陳淑莊喺鏡頭表現出自己幹練嘅議員形象多咗，好多市民都愈嚟愈欣賞依位盡責嘅立法會議員。不過睇返陳淑莊最熱門嘅Facebook文章，內容涉及佢患有嘅腦疾情況，真係令人好擔心，底下網民都紛紛留言幫陳淑莊加油打氣，希望佢早日回復健康啦！

image source:Facebook／Tanya CHAN 陳淑莊

8 葉劉淑儀（329010筆）

喺香港地，唔係特別關心政治嘅人都會識得葉劉淑儀，皆因佢從政多年，一直都係以「好打得」嘅女性官員形象出現。佢曾任職港英政府嘅人民入境事務處處長同香港政府保安局局長，並喺08年當選立法會議員。作為資深政治人物，葉劉淑儀個人動態一直都係備受關注，佢今年最熱門嘅Post就係講自己獲選教育事務委員會主席，隨即引起網民熱烈討論，不過睇嚟網民知道依個消息唔多高興，成2萬幾個「嬲」。

image source:Facebook／Regina Ip 葉劉淑儀

7 楊岳橋（345387筆）

楊岳橋喺依幾年都好出位，正氣又有才氣嘅形象深得老中青嘅喜愛，喺立法會地區選舉到有唔少堅定嘅選者支持。喺2019年，楊岳橋依然深得市民愛戴，雖然年頭鬧出因為佢缺席而無法動議立法會討論單程證審批權議案嘅事件，但佢隨即公開道歉嘅處理手法亦收獲知錯能改嘅好名聲，加上佢今年積極支援參與社會運動嘅市民，令佢人氣持續高企。佢今年最Hit嘅Post相信好多人都睇過，無錯，就係「唔好搞我後面」。

image source:Facebook／Alvin Yeung 楊岳橋

5 譚文豪 (402020筆）

譚文豪喺好多市民入目中有一個深刻嘅印象，就係「型英帥靚正」嘅飛機師Captain Tam。佢之前就因為開咗個Page嚟勁捉電視劇《衝上雲霄Ⅱ》錯處，兼夾分享專業嘅航空知識，喺鏡頭同報章到又不時見到佢分享、評論香港航空界嘅見解。但佢2019年就因為社會問題，放棄咗佢依個咁深入民心，長年持續擔當嘅Captain形象，佢最熱門嘅Post就係關於離開服務近20年的國泰航空公司，唔少網民為佢犧牲而表示感謝。

image source:Facebook／譚文豪 Jeremy Tam

4 葛珮帆（466108筆）

市民聽得最多關於葛珮帆嘅消息，好多都係討論佢學歷真偽問題，更有唔少聲音係質疑佢係喺「野雞大學」到「買學位」。由於佢到依家都未曾有力證明自己學位嘅認受性，實在難以釋除公眾疑慮，所以唔少網民都以「假博士」稱呼佢。2019年嚟講，葛珮帆不時語出驚人，最廣為人熟知嘅就係講及「有警員超過十成皮膚受到燒傷」，震驚大眾，以致佢最熱門嘅Post出咗幾張疑似係警員燒傷嘅相，底下都係一片嘲諷留言。

image source:Facebook／葛珮帆 Elizabeth Quat

2 鄺俊宇 （485951筆）

喺今年6月之前，鄺俊宇有好多稱呼：票王、逗號先生、樹窿、Hip Hop議員等等，而喺6月開始，愈嚟愈多人叫佢做「英雄」同「鄺神」。點解啊？皆因佢咁多個月嚟身體力行，為市民仆心仆命咁四處奔波，希望幫到更多嘅市民，最後仲搞到自己體力不支暈低，感動到好多市民。佢2019年最熱門嘅Post就係佢成為「鄺神」當晚嘅直播影片，佢同朱凱廸議員幫助喺金鍾站被警員搜市民，監督住警員執法。

image source:Facebook／鄺俊宇 Roy Kwong

1 何君堯（2051182筆）

如果真係要講2019年邊位立法會議員最出位，相信十個市民九個都會答何君堯議員喇。無計啦，何議員咁多新聞，又時不時爆出幾句會引起爭議嘅「金句」，網路熱度高過其他議員幾倍真係唔出奇。不過人氣高又唔代表受人愛戴，何議員嘅評價真係好壞參半，係有人會叫佢做「英雄」，但又有更多人唔多鐘意佢。睇佢最Hit嗰個Post，內容關於佢落選區議員，底下留言竟然一片歡騰，仲有成約6萬4個「大笑」。

image source:Facebook／何君堯 (Junius Ho Kwan Yiu)

【以上圖文為香港網路溫度計調查結果，未經授權請勿轉載、改寫】

分析說明：

本研究資料由《KEYPO大數據關鍵引擎》提供，分析時間範圍為2019年01月01日至2019年12月31日。

網路大數據系統觀測港澳地區上萬個網站頻道，包括新聞頻道、Facebook、Instagram及各大討論區、BLOG等，針對討論『立法會議員』相關文本進行分析，並根據網友就該議題之討論，作為本分析依據。

本文分析之結果，非參考投票、民調、網路問卷等資料，名次僅代表網路討論熱度大小，不代表網友正負評價。