鄭秀文（Sammi）將於7月在紅館舉行13場演唱會，日前Sammi推出新歌《心魔》，已引來樂迷極大迴響，《心魔》MV今天（23日）上架，破格和充滿電影感的拍攝手法，Sammi坦言入行以來從未試過。
今次新歌MV，Sammi專程飛泰國拍攝，亦是她首次到當地拍MV，而且導演Kero、拍攝團隊、40位舞者和排舞師，都是泰國最頂尖陣容，加上分別在舊式劇院和郊外校園取景，Sammi表示MV每一個畫面，都能震撼入心！
她說：「今次MV比較特別，親身飛到泰國搵咗當地導演操刀，整個拍攝團隊、Dancers、排舞師等，全部都係嚟自泰國，去製作呢首新歌《心魔》嘅MV。點解呢？喺YouTube睇到一首歌嘅MV，呢位導演拍攝嘅風格，我好鍾意，入咗腦，記喺心裏，好大嘅憾動，如果搵到佢拍MV，一定可以將首歌昇華，多謝經理人（郭啟華）搵到呢位導演，做到呢件事。整個拍攝我覺得非常值得，團隊專業，處理畫面、意境，歌詞裏面最深入嘅靈魂，我覺得係拍到呢首歌嘅靈魂，呢一點相當重要，我一路拍攝，某啲鏡頭我甚至會起雞皮，Dancers唔只係跳舞，佢哋身體嘅率動，都好多情緒喺入面，絕對幫我呢首歌畫面，處理到極致狀態。」
今次拍攝MV行程緊密，Sammi黃昏抵達當地後，馬上回酒店fitting、試戴不同顏色的隱形眼鏡、戴上MV中的長假髮給髮型師修剪等，翌晨9時便埋位拍攝，當日氣溫高達36度，Sammi在悶熱的外景拍攝，直到凌晨1時收工，為在演唱會前夕，保持最佳狀態，Sammi未有機會品嘗當地美食，但她覺得一切辛苦都值得，尤其與40位泰國Dancers共舞畫面，充分表達到歌曲的意境及主題。
她說：「其實好多唯美畫面，亦有勾畫心魔意境、意象，呢啲意象都係用人嚟堆砌，我哋搵咗40位Dancers去拍攝，即使係好簡單動作，人多動作又齊整時候，就有一種好強大震動感覺，歌詞好容易令人進入歌曲情緒，所以好拍到《心魔》嘅主題。」
MV中，Sammi有不少獨特造型，其中一件大褸因為重量十足，令Sammi舉步難行，另外身上的紋身貼紙，要花上近45分鐘剪貼，每一個造型、細節都非常用心。問她拍MV最難忘是那個時刻和造型？她說：「每一個時刻、每一個場境我都好鍾意，導演處理每個場口和細節，燈光和意境都好唔一樣，再加上我為呢個MV做咗好多造型，營造氣氛，完全揀唔到，每一個場景我都未拍過，就連類似都未試過，所以感覺好新鮮。」
能夠順利完成《心魔》MV，Sammi感謝唱片公司的支持，她說：「整個MV嘅籌備過程，我交晒畀經理人處理，要多謝唱片公司支持我飛咁大個團隊嚟泰國拍攝。至於我嘅準備，我即刻諗到歌曲混音部分，點樣做先可以將歌曲嘅意境提升？點樣將成首歌嘅歌詞和音樂嘅靈魂完全呈現？
仲有造型都好多和特別，好快就諗到髮型和化妝，腦裏面有好多形象呈現。去到現場，最震撼係舞蹈，甚至對嘴唱歌部份，有好多連我自己都意想不到，勾起我好深好Deep嘅情緒走出嚟，令到畫面好強烈。因為嗰刻情感係真實，Dancers亦都係帶住豐富情緒演繹，某啲場面有啲毛管戙，一切都來自真摯嘅情緒。」
（即時娛樂）