玻璃朱《中年好聲音》面試片段流出！鬧完傳媒再出文：TVB要多謝我

48歲「玻璃朱」朱庭萱自稱是「煮食KOL」，而最為人熟悉的，可能是她曾自稱是黃宗澤舊愛。「玻璃朱」年初在灣仔駕車撞到一名菲律賓籍男子，事後未能向警方提供呼氣樣本被控，月前被判社會服務令200小時、停牌兩年及自費完成駕駛改善課程、罰款2000元。

「玻璃朱」在社交平台提到今年上半年曾因被控不小心駕駛，而患上抑鬱症。而日前她就參加TVB為《中年好聲音》面試，演唱葉蒨文的《我要活下去》的她，唱完約一分鐘就被評判「叮」走。不少傳媒近日都有爭相報道，不過她卻對於部份報道感到不滿，在社交平台發文炮轟「傳媒記者們，寫嘢唔該專業啲」、「屈我狂轟無線？」、「專業啲啦後輩們」、「你哋打我唔沉㗎慳啲啦」、「唔使再幫我免費宣傳啦」……

昨晚（10月12日）藝人邵子風在社交平台貼出「玻璃朱」面試《中年好聲音》片段，寫道：「搵餐懵！終於畀我搵到！玻璃朱面試「中年好聲音」全集！J住先！」引起不少網民留言和轉載。

豈料片段上架後，又引來「玻璃朱」不滿，傍晚時分再在社交平台出帖文，更表示「TVB真係要多謝我幫你吸引咗咁多另類觀眾。」

「玻璃朱」全文如下：「好想睇我試音唱歌咩？直接問我吖嘛，搵得咁辛苦做咩啫。最後仲有彩蛋同場加映之前喺屋企練歌嘅片段！大家比較下俾啲意見啦。「中年好聲音」試音當日表現真係唔好，唱唱下突然間緊張同震，呢個情形喺我當年玩19區歌唱比賽總決賽嘅時候都發生過。好記得我仲要唱跳，同Dancer排晒舞。點知唱到一半中間intro跳舞時，比（俾）隔離（籬）個dancer撞到手成枝（支）咪飛咗落台。當時自己扮鎮定繼續跳舞，好彩現場幕後同事執得返支咪係台下遞俾我，我仲好輕鬆跳住過去攞執生成功，當時全場亦都拍手掌鼓勵。但反而之後就突然間好驚，個人開始震，跟住個半隻歌就越唱越差震下震下，同今次面試差唔多。我其實冇學過唱歌，睇嚟我都要企台多啲先得 #中年好聲音 #tvb #真係好多謝咁多黃人今次咁支持TVB囉 #唔係話唔睇CCTVB咩 #參加得預咗俾你地笑啦你覺得我會介意咩 #TVB真係要多謝我幫你吸引咗咁多另類觀眾」