召集芋泥控！長沙灣發現一間小店幸子茶屋，主打鍋煮奶茶，挑選台灣茶葉同4.3牛乳，不過更吸引係佢竟然有芋泥肉鬆蛋三文治，仲要係爆餡嗰隻！
即叫即整嘅三文治熱辣辣奉上，由於小店關係，需要耐心等候，必食芋泥肉鬆蛋三文治/$42，厚厚芋泥質感實在，食到微微芋頭粒。調味偏輕手，比較食到芋頭天然味道加埋鹹鹹香香嘅肉鬆就啱啱好。三文治每邊都有烘過，再加隻蛋，食完成份都算幾飽。
廣告（請繼續閱讀本文）
另一款芋泥控不能錯過嘅仲有芋泥鮮奶小芋圓/$32，手工芋泥加濃香鮮奶本身就好無敵，加埋粒粒煙韌嘅小芋㘣，令成個口感更加豐富。
小店其實另外仲有一個主打，就係鍋煮鮮奶茶/$22起，一有order先會煮，總括而言會比較推介佢哋嘅芋泥系列。
廣告（請繼續閱讀本文）
地址：深水埗福榮街218號美居中心地下41A號舖
營業時間：星期二至日12pm-8pm