曾經寫過一篇希望政府走塑問題上走數，因為喺經濟衰退下，重要搞咁多擾民嘢，對經濟復蘇絕無幫助。結果，唔知相關官員好有心為環保，定係啲環團成功挾政府去馬，由4月22號到而家近4個月時間，作為普通大眾，都無得唔接受唔習慣。
近日，有傳媒做咗個實驗，發現有啲所謂可降解餐具，可能添加咗啲混合物，反而降解唔到。呢個都只係講緊降解程度問題，啲物質對人體同環境有無咩影響，都唔覺環團有認真關心過。
喺個報道入面，某個環團「反問為何當局不牽頭、投入資源推動借用餐具系統」，作為一個正常人，搞任何事都會第一時間諗：邊個負責？錢從何來？賺唔賺錢？過去賣地都係政府重要收入來源，2024年上半年，政府賣地及補地價收入合計約42.1億元，按年大減近八成；本財政年度首2個月財赤已經775億。即係至少從財政角度，政府要牽頭搞借用餐具系統已經唔夠動力。
當然呢啲麻煩事，政府十居其九都會招標或批出專營權，起碼都收返啲錢，咁啲vendor就要度好一個business plan賺到錢，但如果要做呢檔全港性嘅嘢，好粗略咁諗由前期買餐具，搵人手收集運送餐具，搵地方收集同清洗，點同餐廳合作提供餐具，建立一個電子平台畀用家借還餐具同埋收錢，用咩payment gateway，每年capex大約幾多？做呢檔嘢預計平均每人每月用幾多次收幾多錢先至有利可圖？環團有無做過相關合理估算覺得可行？只係一味問點解唔做，你至少都證明到個業務係可持續啩？條數都未計餐具損耗，或者潛在衞生問題呢啲複雜嘢。
做過下資料搜集，坊間有公司可重用餐具租借服務，但都只係講緊大型活動租用。拎佢哋價錢做下估算，一支公一餐飯鐵羮鐵叉租金2蚊，聽落唔多，但4人家庭一餐就係8蚊，一個月每日一次外賣就係240蚊，而呢個數係講緊閒閒地5-60蚊一個飯基礎加上去。經濟好當然無問題，但而家時勢，大家慳得一蚊得一蚊之際，反而要所有人百上加斤？畀啲空間大家唞氣啦。環保係應該從心出發，唔係玩形式主義。
至於借用餐具有無得做？實有，我自己做過一個初步估算，長遠講回報有機會相當唔錯，只係timing is everything 。環團靠捐款維生，但絕大部份香港人都係靠自己一雙手生存，呢個已經決定咗，環團注定唔會同普通市民有共同語言，唔會諗點樣從人角度出發推行環保。
金缸經
註：專欄作家言論不代表本網立場
密切留意BossMind動向！立即CLS