精準嘅訓練需要配合精準嘅智能運動手錶，再加多個精準又細心嘅教練 ，難怪咁多跑友慕名而至 – Suunto Run Club。
利申，呢篇唔係廣告唔係鱔稿，一毫子都無收過……雖然我好想!
已經忘記邊集，當時魏Sir (魏賡) 俾我嘅感覺係一個極佛系嘅人，佢嘅跑班 – 賡班，無任何官方途徑或社交平台讓你了解或加入，一切隨緣。事隔數月後得知佢成為運動品牌跑班主教練，佛系跑手搭配講求精準度嘅智能運動手錶所衍生出嘅跑會，頗耐人尋味但又令人期待。
成立日子雖短，但憑藉 Suunto 多年專業品牌形象，加上魏 Sir 於跑界嘅實力及人氣 (仲要靚仔，離很晒譜)，受訪學員加入原因一律因為佢。Suunto Run Club 瞬間成為極受歡迎跑會之一，難怪總代理堅定不移，苦候多時，主教一職非魏賡莫屬。
能成為精英跑手，性格可以佛系，但對於跑步呢回事，肯定嚴守戒律。有外表有課表嘅魏 Sir 嚟到呢個以比賽為本嘅跑會，明顯着重強度及訓練嘅精準度。為此，佢親自揀選及邀請助教及配速員加盟。為免同學有孤軍作戰嘅感覺，唔同組別都會有各自嘅配速員帶跑，當然亦有較輕鬆嘅組別以供選擇。一如以往難逃刼數，自己被安排到 Sub3 小組嘅 interval 訓練，自從當上試跑員之後，去到唔同跑會都被誤以為嚟踢館，總有可怕嘅訓練等緊我，陰公!
「賡班」好「Suunto Run Club」好，令人感動嘅係魏Sir 依然堅持陪伴最後嗰位同學一齊跑，從旁鼓勵。仍記得自己學跑之初，往往就係最慢嗰個，莫講話尾燈，連屁都聞唔到嘅嗰份挫敗感，深深體會過。
寳貴嘅係，魏Sir 呢一份細心同體貼，唔少也曾當過新手嘅進階跑手，會於某個時間點被逐漸淡忘，但喺佢心目中卻一直被珍而重之的盛載著。魏 Sir 與 Suunto 呢個組合明顯成功地詮釋咗何以科技如何精準如何一日千里，還得配以人際間嘅溫暖才能發揮最大效用，縱不至天下無雙，但起碼雙得益彰。
講咗咁耐，究竟「Suunto Run Club」同「賡班」有咩唔同？ 起碼唔使只靠緣份，會有正式官方途徑同社交平台去了解跑會，同埋知點報名加入囉！
The post 尋找跑會的故事 #29 | Suunto Run Club 科技與人性之上乘搭配 appeared first on Fitz 運動平台.