上天給Adrian的禮物是一對識得笑的眼睛，頭30秒會令人以為他善良、親和、樂觀、誠懇，其實……唔止囉 (老闆睇少陣後面班友就整古做怪)
上天和許多班主任一樣，都是偏心的。那些型富帥我都算，仲要聰明；那些生得高大威猛我都算，仲要頭髮烏黑濃密，有冇理下我感受。那些被上天寵愛、拿著細包大包禮物來到人世間的，不會知道我們這些人生霉友如何掙扎求全，多少次迎著冷眼與嘲笑瑟縮一角，讓條路出嚟唔好阻住那些被揀選的衝刺。
「你係唔係A仔 (專注力不足及過度活躍症)？」我問 Adrian。
「絕對係！」
A童降世
Adrian 出廠時沒帶著什麼手信，有的是令父母和老師痕都頭晒嘅專注力不足及過度活躍症 ADHD (冷知識：本港學童發病率與國際數字相若，5至9%，以男童較多，相信山界的A仔巴仙會更高)。有個「症」字，即係病。Adrian 細細個已經坐唔定，冇耐性，上堂郁身郁勢唔專心，考試自然獲得不理會俗世眼光的成績。除非你個樣好 cutie 又或者阿媽係家教會主席，否則你不會有快樂和成就感的童年。
(學術討論:「過度」是指過了條平均線或者在 bell shape curve 的兩端，點解那些過度不活躍及專注力離晒譜高的，不會被視為「症」?)
小Adrian細細個坐唔定，鬼鬼馬馬，你咪理，氹得姐姐仔好開心
背帶著小A童上山吸收靈氣，咁幸福嘅裝備、咁考順嘅父親，不知熊貓是否有售？
Adrian 雖然細個唔讀書，但大過左之後冇做運輸。有一日，他成為 Chartered Engineer (傳說中是坐係度簽個名等收錢，你真係信?）有一日，他險些成為奧運選手；有一日，他與朋友創立了賣運動裝備的 Action Panda，短短10年能與油麻地那間龍頭鋪鼎足而立。呢隻動力熊貓雖然位處觀塘工業大廈樓上舖，但特別深受年青跑手喜愛，不惜行4層樓上去買gear吹下水聞下啲gel味 (有電梯㗎，不過佢哋鼓勵跑友做下爬升）。
幸好，這位人生勝利組的頭髮都遇到挑戰，令我有番少少自信。
與 Adrian 在他屋苑商場的 Café tea，一話影相，A仔的本質就會流露出來
由會考得幾分到特許工程師之路
「我會考得幾分，repeat 咗一年，終於全科合格，後來入左青衣 IVE 讀工程。」全科合格都是一項成就和感恩，那些上天的寵兒不會明白的。
由全科合格去到成為特許工程師是一段超馬的距離，後來有高薪厚職的工程師唔做，開實體零售店，估計是過度活躍症病發。Action Panda 在2018/19社運期間要入深切治療，踩著風火輪的 Adrian 走過一條好technical 嘅人生路，期間遇上許多放下和堅持的取捨，哪吒PK命運，誰能笑到最後?
「中學嘅嘢我唔知讀嚟做乜 (metoo)。由細到大啲人都話我心散，其實我喜歡思考，多嘢諗。」呢個原因OK喎，要記低先。
「入左 IVE 讀 High Dip，發現原來我讀嘅嘢係好有用。我好用功，成績不俗，4百幾人考頭10，收到科大同理大嘅 degree course offer，科大是 full time，理大是 part time evening。我14歲就出嚟做嘢，做過救生員、維修水電、機房。我選擇理大，可以繼續工作。」
「讀理大期間，我去一間著名工程顧問公司見工，佢哋話個 post 要有degree，其實我在 High Dip 學嘅嘢與大學相差無幾，而且我即將也獲 degree。我主動提出減兩三千蚊人工，佢哋又肯，用9000蚊請左我。」都係果句，只要自己唔尷尬，幸福就是自己。
由會考幾分走到理大工程系畢業(2016)，條路好technical，需要啪好多堅持gel
「間公司出名 chur，每日要做13、14個鐘，我夜晚又要去返學，試過連續9個月冇放假，果時冇拍拖。做左6年，好多謝公司train到我唔怕攰，對日後做生意好有幫助。」年青人，一定要記低埋呢句。
與奧運擦身而過
「我好鍾意運動，特別係扒龍舟，玩左十年，是港隊代表，參加過世錦賽、亞錦賽，但未去過亞運。其實我終極目的地是奧運。」翻查資料，龍舟是2020年東奧的表演項目「如果要去A grade 嘅奧運，必須在 B grade 嘅亞運取得第四名或以上。但那年港隊只能在亞運獲第五名，最後無緣奧運，心情低落了好一陣子，我也從港隊退役。」命運暫勝 1：0。
龍舟港隊(2012)，好濃密的頭髮，好鮮肉
「我幫公司搞左好多活動，其中一項是會德豐百萬泳，在淺水灣舉行。我嘅 partner Kinson (Action Panda另一股東)住鰂魚涌，我哋約埋由鰂魚涌經孖崗跑去淺水灣練水，練完又經孖崗跑返鰂魚涌，係我第一次跑山。」練水啫，使唔使來回孖崗兩次。
如果搵 Adrian 去推廣扒龍舟，應該好多女孩子會加入
險死於弋壁沙漠 (唔係標題黨)
Kinson 見 Adrian 舊電真係得，於是與他報跑 XTE 弋壁沙漠Gobi Ultra (2013)，也是 Adrian 的第一個越野跑比賽 (第一次就走去跑沙漠，真不知怎申請到批文)。「我用左4個月去train，係華景山莊條斜路跑上跑落。但點知臨出發前 ITB 出事，不過都照去，結果攞左全場第三。」又一位被生意耽誤了的跑手。
「果時我只有廿零歲，呢場比賽好 life changing。弋壁沙漠經常有沙龍捲，山丘地形同高度每天都在變，果時 GPS 又唔係好成熟。我去到一個位叉錯腳轆咗落去好深嘅地方，隻腳傷左流晒血。太陽就咁曬埋嚟 (配合畫面是有禿鷹在天空打圈)，我見到上面有人經過，大聲嗌，但冇人聽到，電話又冇訊號，大會嘅車只係跟住最後面的參賽者。」
一場令人伸條脷出來的賽事，一次 life changing 的旅程，一世人應該起碼經驗一次
「果時諗過離死亡好近，覺得自己好渺少。我同個天講，如果我冇事返番出去，我會畀心機做嘢，唔會浪費生命。」雖然呢啲說話都好「行」下，但難得個上天又信佢。「果刻我覺得所有困難都係要靠自己去面對，去解決，唔想死就唔可以放棄。於是拼命爬上去，可能我真係好 hyper。終返回賽道。」Adrian 的堅持，贏番鋪命運，1：1打和。
放下7萬月薪去湊熊貓
返回香港，Adrian 做賽後檢討，發現裝備十分重要。「我哋帶過去嘅背囊、眼鏡、錶、power gel 都唔係好合用，同 Kinson 提議不如入啲貨返嚟自己賣啦 (是合理的推論嗎？) 於是聯同最核心玩山嘅60多位朋友組成「追夢行動」Dream Chaser，萌生開一間賣裝備的鋪頭。諗住就算賣唔晒，我哋咁多人都可以食晒啲貨。」常常覺得人往往有結論同立場，才去搵些原因做配菜合理化個結論。
「Kinson爸爸在觀塘有間工廠，俾左不足一百呎地方我哋放貨，做少少display。後來霸下霸下，到而家有3000呎。」
熊貓早期是劏房戶，櫈都冇張，似隨時執笠走佬款，留意右面的公司招牌，會放係熊貓館珍藏
「點解叫Action Panda?」
「我哋諗要用A字頭開始，因為用字母排會排先啲，我睇 Overlander 排產品都係跟字母。於是決定用 Action，跟住想用一隻動物，諗過 bear、tiger，覺得 Panda 平易近人，又可以代表香港嘅 Chinese，而且黑白色夠簡約，於是用左 Action Panda。」
「Action Panda 2014年成立，有三個partner，我、Kinson同阿Kent，分工清晰，Kinson 對內做管理，佢係gear L，好熟悉product，但唔會著公司貨，佢要著人冇我至有嘅，係佢導我成為gear L。我鍾意同人傾嘢，擅長開會 (同 Adrian 傾計，他十分回應到重點，是開會必備能力)，主力對外。Kent 本身係電腦同體育老師，負責 develop 個 system，果時要自己寫網站。」
熊貓三位股東，右起 Adrian、Kent (玩三鐵的大隻佬)、Kinson (頭髮好濃密個位)。一齊測試袋嘅承載力，結果手抽斷了，個袋冇穿，pass
鋪頭有發展，不能三個都係兼職經營。「我哋商量好以人工高低排列全身投入次序，Kinson 係第一個 quit 左份工轉全職，跟住係阿 Kent 唔做老師，最後係我。我當時人工已有7萬。」
2019年的團隊，雖說有人坐享共成，幸好事頭婆是法律界人士，相信會公平處理
「機會成本好大，你點可以輕輕放下?」
「我一向都鍾意做生意，唔喜歡打工，可能係唔鍾意聽人講。我父母係街市賣海鮮，成日聽佢哋講要學識控制風險，有乜嘢自己瀨，瀨左就學到嘢，可能耳濡目染。」怪不之我學到咁多嘢。
迷失中年
「我做左7年 full time 工程，到左第四、五年已經搞其他生意，開過 party room、桌球室，做過紅酒、二手名牌服裝，同區議員合作嘅慈善嘢，跟住做貿易代理，又開間工程公司。同一時間有五、六間公司，個個禮拜都要返大陸，去到 Covid 前兩年，每日只瞓四、五個鐘頭。不停忙不停忙，突然唔知為左乜? 好lost。」文青上身定。
開過波樓，當年游走黑白兩道，唔知有冇遇過傻強
「唔係為錢咩？」
「唔係，我對錢唔係好有感覺，只覺得係一堆數字同工具。」
只有上左岸或富二、三袋至有資格講呢啲說話，anyway，都要記低呢啲對白，講出嚟好型下。
「果時好忙，停左兩年冇跑步，每日食一兩包煙，飲好多酒，係桌球室要同黑白兩道週旋，我習慣每年都會同自己做個review，我問自己係唔係想過呢啲生活?」現在信他喜歡諗嘢。
「我細個有地中海貧血症，阿媽吩咐我唔好四圍走，因為一跌親流血，就會不止，即係會死。小四學校開陸運會，我報左唔話俾阿媽知。發現運動原來唔會流血，就算流血亦唔洗死。中學對運動熱情更一發不可收拾。」運動亦是 Action Panda 三個partner的根。
「我將其他生意賣嘅賣，送嘅送，全部收檔，只剩下 Action Panda。雖然我鍾意同一時間做好多瓣數 (A仔樣本)，不過也可以係同一行業中做多元化發展，例如 Facebook 攪 live、Instagram、road show，搞山賽，去大學做贊助等。公司亦開始請第一個 full time sales。」
「3球野」是 Action Panda 的 signature 活動，Adrian 說是新手友善，希望導更多人入火坑 攝: Lam sport photos
「摺晒其他生意專心搞一瓣，點解咁睇好Action Panda?」
「係 Action Panda 攞到嘅人工當然低，而且一賺錢我哋就用嚟買貨，放番晒落去。以往搵到錢就會去應酬，飲飲食食，冇錢剩，而家賺少啲，咪使少啲。」放下與堅持的取捨，有時不可以由計數機決定，俾自己任性少少，just follow your heart。
熊貓乘過山車衝浪
「Action Panda 的第一個浪頂是2017/18，當年 Garmin 被引入香港，起初的Forerunner 9xx，黑白mon，銷情一般。但當推出 Forerunner 235 時勢不可擋，千幾二千蚊，GPS 錶嘅入門版，橙色好賣到癲。呢隻錶可說是 Action Panda 的金蛋，我哋唔係代理，但超好賣，每日搭車去荔枝角 Garmin 間公司攞貨，起初攞十幾隻都有啲驚賣唔晒，到高峰期攞二百幾隻，要俾 cash 唔收票，因入唔切。一落 fb post，即有單入，熱賣持續了9個月。Forerunner 235 令我哋賺左第一桶金，仲有第一桶客。」
就係呢隻錶為熊貓帶來第一桶金，我當年都有課金入揮手區
「以前係我哋叩門問可唔可以俾貨熊貓，到而家多左客，代理問我哋可唔可以食某啲牌子。以前半年攞一次貨，做pre-order，到而家可以即時攞貨，cash flow 好好多。」
有浪頂，自然有浪底。「Panda 嘅浪底是2019的社會事件，跌到爆炸。跌到要叫啲同事唔好返工，得返我哋三個老闆頂住，因我哋唔出糧。」
「社會事件中後期，生意穩步回升。但跟住疫情，又暴跌，雖未及社會事件嚴重。疫情時冇嘢做，我哋同間化工廠攞左好多漂白水同清毒藥水，買啲膠樽返嚟一樽一樽咁入，免費派，又派埋口罩。」
「過左疲情高峰期，好多客上嚟買番嘢，因不能離港，多左人行山。生意又爬番上頂。賣T8口罩是第二隻金蛋，不過而仲剩番超多。」Adrian 笑得好大聲。
停了兩年的公司annual dinner又舉行番，Adrian話儲左兩年至夠錢請同事食，酒微菜薄但情義濃
H鞋劈貨的災難
「H鞋嘅代理生意多到好誇張，一季 (即係半年)可以賺到一層樓，一年兩層樓。代理同我哋講油麻地果間全港攞貨最多，你哋第二，你哋會唔會攞到同佢哋平手？」幸好 Adrian見慣風浪，不為所動。
「湧左上浪頂，又滑番落嚟，開關之後，生意走下坡，港人去旅行和北上消費，而且大環境差，消費力弱。再加上H鞋劈貨事件，造成災難後果，我哋冇跟市場劈價去貨，高峰期我哋有三萬對H鞋。慢慢消化，到而家賣晒。」滿城盡是H鞋的歲月，是越野跑鞋歷史慘烈的一頁。
如果要係H鞋上面加個限額，我希望係一萬對 (今天不適用了)
「點解唔劈價？」
「其實可以劈到幾舊水一對，但我哋唔想嬸嬸叔叔都買對厚底速羊去街市，會好易扭親，著唔慣megagrip，啲釘可能會俾電梯夾住，我哋唔想咁樣。亦托賴我哋幾個partner唔係咁貪錢，幾個風浪都安然渡過。」小貪怡情，大貪玩命。
「面對困局，其實我哋仲做左海量嘅工作推廣、搞比賽、Panda Run 團跑等。我哋應該係首批搞免費團跑，目的想俾人知道easy run其實唔使錢，外國好早已經講 zone one zone two 跑。
「其實有同事投訴過，呢啲活動冇錢賺，又要俾人工又要請教練，不如留番啲係facebook、IG落廣告。我話唔好睇少每日一點一滴，全部可以add up。」唔播種，那有收成；冇耐性，點等到黎明 (咁蹺押到韻，即刻feel到有力好多)。
由裝備到裝備L
「Gear 好多時由比賽衍生同帶動，例如 UTMB 嘅 mandatory gear 要求防水風褸必須要3萬mm防水，供應商必須生產 water proof 102K 防水度嘅褸。以前防水褸胳肋底會穿窿，但 UTMB 規定成件衫要seamless，有窿就 DQ。另外跑手因要造時間，生產商就會將 gear 輕盈化。」情況有些似電腦硬件由 software 同遊戲帶動。
「香港嘅裝備市場同外國嘅有乜嘢唔同?」
「我每年都外出睇產品5-8次，發現歐洲、加拿大美國等嘅 gear 係超級普通，以功能耐用為主，日本嘅 color tone 好靚，size 係 Asian fit，不過佢哋盡量賣本土嘢，保護自己品牌，設計原創，唔抄外國，例如斜開拉鍊，防水衫會開個窿俾你睇錶。」
「以前香港裝備市場上貨速度落後歐洲約半年，但而家代理同外國關係好，可以做到同步。香港人是追款。今日 Norda 001 出左新色，我就要第一時間擁有。所以香港嘅 gear 二手市場好蓬勃。香港係款式方面是領先歐美，十分先進。」Gear L 總算為港增光。
「講下本土嘅gear L，有冇啲好癲、好西嘅客?」
「我哋向同事講 Action Panda 唔係硬 sell product，係 sell service 同體驗，顧客想聽意見，想知 story behind，會理性消費。好多客都玩山賽，大家都有好鍾意吹下水，關係良好，所以我哋冇乜西客。」
走到幕前推貨，sell 鬼馬、精靈、節奏，追加靚仔鮮肉feel，應該殺死好多山系女孩
「好多零售店都做埋產品代理，你哋好似冇做?」
「其實有唔少產品都搵過我哋做代理，有啲我都流晒口水。有一隻gel賣左6年，我哋係第一間鋪賣。佢哋想我哋做代理，一年可以搵五百至一千萬，但最終介紹左俾另一間公司，同事都有 complain。但我盡可能唔使代理任何產品，唔想影響 sell 貨品時嘅公平性。」
「我最想做嘅唔係賺錢 (想像員工在背後滴汗)，係推廣運動，有少少使命感。」我留意到 Adrian 講呢句說話時冇眨到眼。
Logan Mok是港隊三鐵代表，剛男拔萃畢業，熊貓贊助了他兩年
熊貓贊助體院30對鞋和600個度身訂造嘅袋予運動員
熊貓與Cam 2，邊個望邊個尾燈？(擺明標題黨)
「Action Panda 同其他賣裝備嘅鋪頭有乜嘢唔同?」
「市場可分為ABC grade，A class 指連鎖店，例如運動家、馬拉松、Nike、太古集團果啲。B class 例如 Overlander、Reecho、Protrek、毅成。C class 指得一間蚊型鋪，老闆要係鋪面幫手做 sales，例如我哋、Action X、Blue Mountain、Trailblazer、Round the World等。Cam2 係介乎A與B之間，佢哋係港隊，我哋只係丙組。」
會係KT (Kwun Tong)園工作，講到老闆咁好，要慎重考慮
「從客角度，對 Action Panda 同 Cam2 有乜嘢唔同嘅印象同感覺?」
「Action Panda 係樓下街市檔，Cam2 係領匯商場嘅街市。」好清晰，明白晒。
好多時我哋上去買嘢，都好鍾意同職員吹下水，攞意見 (同攞discount)，分享賽事嘅苦與樂，插下 CP 啲杯麵晨早派晒。之後好開心好舒暢咁離開。同 Adrian 都好懷念 Cam2 嘅 Frankie、大細通、Plato、占士、偉雄等年代，吹得好開心。畢竟人都係珍惜關係，喜歡溝通、被理解，其實 shopping 同越野跑一樣，都係感性行為!
彩蛋
約 Adrian 做訪問是我第一次與他溝通，為了成事，多多少少美言幾句 (唔係虛偽，只陳述我認同的事實)，常帶笑容的 Adrian 卻以謙遜自嘲回應，最難得的是連頭髮這些男人敏感位都泰然處之 (另一難得嘅，Adrian 話細細個已經睇我嘅文章，仲話篇篇都有睇，我當然選擇相信)。大家來回搓了幾板，感覺像是相識多年的老朋友在閒聊吹水 (係好易欺騙我嘅感情)，沒有隔膜。在 Action Panda 鋪頭見他與客介紹產品，誠懇有溫度，親和力超高，客的荷包自然順滑解鎖。下次上去，提你要保持克制同行樓梯。
最近Adrian忙於招呼第二名小生命(已有個哥哥)，恭喜恭喜。祝願佢好似父親一樣，喜歡笑同熱愛運動，但頭髮方面，就要似媽咪。