唔跑得步 講下跑步係咪攞嚟賤
正常人喺生活中，通常都會避開唔舒服嘅感覺，好食懶飛，可以坐的話不會郁，尋求享樂追求快感，千方百計取易不取難，行路揀條短嘅，對辛苦敬而遠之。跑步啱啱相反，取難不取易，越跑越長越跑越遠，視辛苦為享受甚至快感嘅一部份。呢亭行為可算係反智，但點解仲有人樂此不疲，追求乜鬼嘢呢?
做乜鬼要跑步已經唔算難答，更難答係跑步有乜得著？香港人着重功利，叔叔同一眾 跑步 L 都唔唔例外，一日24小時，又要搵食又要陪屋企人又要顧自己，仲要練跑? 咁究竟跑步有乜鬼嘢咁好跑呢？
消失咗嘅 C 先生講過，英國攀山家 George Mallory 嘅名句，有人問佢點解要攀山? 又危險又勝，佐冶仔好型咁答 : “Because it is there.” ，個山喺度，我咪攀囉!
簡單到暈，型到核爆!
但如果有人話，去跑步就係因為條路喺度，實俾人嗤之以鼻，除非講嗰個係保特!
叔叔同大部份中年麻甩佬一樣貪生怕死，打針抽血都要瞇埋雙眼，竟然願意接受跑步嘅辛苦，真係咁事有蹺蹊?
跑步其實違背身體意願，係一項同身體嘅角力，身體要享樂，但 跑步L 又偏偏要憑意志戰勝攤唞嘅誘惑，以辛苦代之。跑步L 累積咗一千幾百公里跑齡之後，對自己身體敏感至極，每一塊骨頭每一條肌肉絲嘅毫變化，都好似瞭如指掌。由辛苦到享樂到辛苦，跑步 L 不斷測試自己底線，不斷將自己底線推向以為不可能嘅極限，Impossible is Nothing，做得跑步 L ，方為人上人。
其實叔叔諗嚟諗去，都答唔出跑步有乜鬼用，因為我擔心問呢條問題嘅人唔會明白。人生已經咁鬼辛苦，點解係都要增添辛苦，我唔識答，問問題嘅人或者會禮貌地點頭，表示理解，但我知道佢哋心底裏已經有答案 ，你班跑步L ，攞嚟賤!
妖，咁條路喺度吖嘛!
完。
唔跑得步 講下點單支跑步
跑步係好個人但又好群體嘅活動，個人係因為大部份比賽都係用個人做單位，你有你跑佢有佢 Run，群體係因為練習嘅時候通常都係一班人一齊，而且你會發覺有人喺側邊吹住水跑，好似無咁辛苦同埋唔覺唔覺就跑完咁。
賓叔叔因為搵食關係，無奈要單獨練跑比較多，無論長課短課 Interval 都係單支練，除咗自律性要強之外仲有一個重點，悶得，同點令自己無咁悶，甚至享受。
單獨一個人跑嘅時候，接觸到寧靜，有時甚至聽到呼吸心跳，聽到來自大自然嘅風聲鳥聲流水聲，有來自晨運客同其他跑步者嘅對話，但我最享受嘅聲音，係來自自己，係自己一個人跑步嘅聲音。
我學懂去聽自己嘅呼吸，所有跑步者都知道呼吸嘅重要性，但跑步者通常唔會分分秒秒鐘留意住自己嘅呼吸。感受呼吸嘅存在，當你刻意去聽嗰陣，可以聽到呼吸聲。呼吸聲好神奇，當你刻意去指揮呼吸，你會發覺跑嘅每一步都有唔同嘅表現。
我清楚聽到自己嘅心跳，或者話我認為自己聽到，上運動科學時候嘅知識話我知，雙腳能夠不斷跑，全賴心臟喺度指揮血液流通，於是我試下問我個心：喂，我呢個狀態仲可以跑幾耐?
好在，個心無答我，唔係嚇 Q 死!
我開始自己同自己對話，腦海裏出現好多問題，可能係開心或唔開心嘅事情，但通常係無聊嘅東西，例如今晚食乜好，頭先去完廁所有無冲廁之類，前面背影好靚嘅女仔正面會係點嘅呢？試過好多問題都係喺跑步時候不知不覺解決咗，或者忘記咗，其實唔係有心去解決，總之跑完步之後，發現有啲問題原來好簡單平常。跑步彷彿提升咗我嘅判斷能力同分析能力。
馬拉松，Ironman 或其他耐力比賽嘅後半段，可能係前段太快，亦可能係操練不足，體力開始不繼，縱使有堅強毅力，但身體明顯好似支持唔到落去，放棄 Or 死頂係一個大問題。呢個時候你就會同一條友進行討價還價，而呢條友就係自己，平時練習同自己傾偈嘅能力呢個時候派上用場，賓叔叔同大哥誠嘅辯論比賽正式展開 ……
賓叔叔 : 好那倦，我膝頭好痛。
大哥誠 : 係囉，咁辛苦，前面仲有條大斜坡喎，不如 ……
賓叔叔 : No! 收嗲 ，講都唔准!
大哥誠 : 妖! 反正又唔會攞到獎，頂籠有靚相，不如 DNF 返去飲啤酒啦。
賓叔叔 : 唔得，點都要頂返去終點，老大都唔 Quit 。
大哥誠 : 你幾十歲，頂唔順退賽無人會笑你㗎喎。
賓叔叔 : 有!
大哥誠 : 邊個咁仆街笑條死老鬼?
賓叔叔 : 我，即係你!
大哥誠 : 又好似係喎，死老鬼笑死老鬼，好正常吖。
賓叔叔 : 所以，頂埋佢!
大哥誠 : 好啦好啦，怕Q咗你，上啦頂!
全靠平時獨跑自己同自己傾偈訓練有素，所以叔叔從未試過退賽。
信不信由你!
完。
不喜勿插 898
#賓叔叔唔跑得齋講跑
(待續)
The post 賓叔叔唔跑得齋講跑系列 (八) | 跑步係咪攞嚟賤? appeared first on Fitz 運動平台.