國難當前 記得FC
我哋呢個世代本身已經夠晒資訊爆炸，亂世之中，網路上更加充斥著一堆來源不明、未知真假嘅傳言同祕方，特首都話咗防疫工作好大一部分要又闢謠又澄清咁，事關健康大家都好緊張兼好認真咁fact check，今日DailyView就用網路大數據帶大家睇睇到咗呢個關頭大家都關心緊乜呢？
DV小教室：網路溫度計透過《KEYPO大數據關鍵引擎》，觀測、爬梳港澳地區近萬個網站、頻道，其中包括新聞頻道、各大討論區、FB、IG以及Blog，從中取得資料樣本數，並以AI語意程式作數據分析。「網路熱度」為主題項目相關的網路posts和comments ，數值愈大代表主題項目的討論度愈高。
10 口罩正確戴法？（657筆）
人要恐慌起上來，真係連呼吸都會諗辦法點先可以抗疫啲。戴口罩本身咁直覺化嘅事，突然喺網路流傳「反著戴」甚至有「分健康或病患嘅戴法」一說，已經有好多新聞求證專業醫生，一般三層設計嘅外科口罩戴法只有一種，就是防水嗰面向外（普遍係有顏色嗰面），吸水嗰面朝自己戴，主要就係一邊預防人哋嘅飛沫傳染、一邊吸收配戴者自己嘅口水飛沫。如果係單色口罩，可能要先犧牲一個口罩用少少水區分邊層係吸水面。分完內外，仲要搞清楚上下，有金屬條嘅一邊向上，風琴摺紋要向下，橡筋往兩邊耳仔勾好之後，要將金屬條貼實鼻樑，戴完之後將面頰兩邊都往內摺，就可以緊貼晒塊面，完美包覆鼻、口同下巴先叫做正確戴法。
9 武漢肺炎係唔係人工病毒？（708筆）
疫情爆發初期，大家對呢個新型冠狀病毒一無所知，隨之而來嘅係各種陰謀論。先係有印度學者研究發現新病毒刺突蛋白同HIV部分蛋白相似，因此引發廣泛討論係咪人為植入愛滋病毒嘅生化武器（初版文章已經被發表團隊撤回）；加上呢幾日新聞報導嘅「俄國官方認證」，但其實就係俄羅斯月初發表嘅一份報告，裡面講到2019-nCoV被懷疑係蝙蝠冠狀病毒同未知來源嘅冠狀病毒之間的重組病毒，同SARS-CoV排序至少70%相似，它不是天然來源，而係一個綜合體。本身「病毒重組」喺基因界非常常見，但正因為呢幾個關鍵字，令唔少陰謀論者係度捕風捉影。簡單啲答你問題，武漢肺炎作為人工病毒嘅說法，目前係無可靠來源同證據支撐。
8 邊種口罩規格先有效？（888筆）
依家市面上嘅口罩品質參差不齊，大家好似要破解暗號咁係咁研究各種標籤同數據。常見嘅BFE（細菌過濾效率）、VFE（病毒過濾效率）、PFE（顆粒過濾效率）其實係美國材料和實驗協會（ASTM）嘅檢測標準。ASTM F2100-07 標準對細菌過濾效率嘅要求係第1級（低防護）≥95%；第2（中防護）和第3級（高防護）就≥98% 。歐洲嘅EN14683同美國標準接近，都係同樣數據分三級。另外仲有日本嘅PM2.5，顧名思義就係為阻擋空氣中直徑≥2.5微米嘅懸浮粒子，基本上都阻隔咗99%嘅飛沫細菌。無口罩又驚，有口罩都要驚佢規格唔啱，想知道更確切規格嘅可以參考消委會之前針對市面上嘅產品做過嘅測試報告。
7 乜嘢可以有效殺菌？（1167筆）
大家對細菌嘅危機意識來到最高峰， 好多居家偏方因而誕生，譬如醋含有5%嘅醋酸，當白醋接觸到感冒病毒等細菌嘅時候，會改變當中嘅蛋白質同脂肪質，從而殺死佢哋，但譬如沙門氏菌等病菌，就因為醋酸無法穿透表面嘅「生物膜」而無法殺死呢啲菌。仲有人話切個洋蔥擺係屋企可以吸附病菌，但其實呢個講法只係以訛傳訛，並無實際理據支持。已知蒸口罩重用呢招係絕對唔得，竟然仲有進化版用薑啊蒜頭啊清蒸。你以為蒸魚咩？再強調一次，常見嗰種外科口罩係唔可以重用㗎！原則上掂過水、或戴超過8個鐘嘅口罩就要丟。雖然飲食療法行之有年，但係食落肚同用來當殺菌工具，依然係有差別㗎。
6 中國確診數字可信？（1243筆）
疫情爆發初期，就有唔少消息直指中國政府嘅遲報，導致病毒迅速嘅蔓延。隨著李文亮醫生—率先向外界披露疫情嘅前線醫療人員之一嘅離世，被爆出當時李文亮發布消息後甚至被公安局約談同扣上「發布不實言論」嘅警示，令唔少人都擔心中國政府處理病情嘅速度同公開程度。及後中國政府「更新」咗統計標準，根據官方數字，除咗疫情核心湖北省之外，其他省份嘅確診數字已連續10日下跌，但係調整過嘅統計方式下，武漢市嘅確診案例，比湖北省整體還要高，同樣被質疑可靠性。截止2月24，根據中國國家衛生健康委員會官方網站顯示，現有確診47672病例（累計確診共77658例），累計死亡病例2663例。
5 洗手正確技巧？（6292筆）
大家都好似做返小學生咁，唔單止超級自覺唔會亂捽眼捽鼻，連洗手都要認真背口訣，開水整濕雙手、加梘液順序搓手掌心>手背>手指罅>指背>拇指>指尖>手腕，乖乖地搓夠最少20秒，用手沖乾淨雙手，先用抹手紙抹乾隻手，再用抹手紙扭實水龍頭。至於大家各有爭論嘅酒精搓手液，係乾手嘅情況下消毒速度係比一般洗手快嘅，不過如果已經掂到有菌嘅潮濕表面，消毒速度就慢啲。不過有時喺條街突然打咗個乞嚏或唔小心掂到污糟嘢，一時之間搵唔到廁所洗手，消毒搓手液夠方便啊嘛！基本上雙手無明顯污垢嘅時候，用酒精搓手液代替同樣搓均隻手，係一樣可行嘅。
4 幾時先封關？（6342筆）
香港人發夢都想政府宣布「封關」，叫做終於等到但絕對未如民意所望。呢次封關措施係針對近日疫情失控嘅南韓，除咗發出紅色外遊警示，由24號限制南韓旅客、或過去十四日內到過南韓嘅飛香港居民入境，而去過南韓大邱市嘅香港市民，返港後則要入住檢疫中心兩週。咁樣嘅消息當然換來網友諷刺「雙重標準」，儘管香港政府於疫情最早期宣布嘅關閉落馬洲同羅湖等關口，但實際上佔自由流動量大約70%的未封關口，依然存在危機，引發前線醫護人員嘅抗議同香港人嘅兩極評價。近日有傳湖北省逐漸半解封，會唔會為香港、甚至全球帶來另一波衝擊，都係未知數。
3 邊度可以買到口罩/酒精？（6680筆）
呢排大家出街經過藥方都會下意識望一望，雖然可能更常見嘅係一張紙寫著「口罩/酒精售罄」。當初市面上嘅口罩被搶購一空，大家仲有網購一途，但係全球都缺罩嘅情況下，好多海外直送都缺貨，或者要留返俾本國人用。香港依家已知方式有屈臣氏嘅用實名制登記買口罩，唔使再喺現場打蛇餅排隊。而主打香港製造嘅口罩工廠，就於25號開放會員登記，之後可以率先知道口罩開售資訊。有網友就提供咗小貼士，醫院或者急症室外面有售賣機，夠運氣的話可以買到幾個來應急。口罩欠奉，不過要買酒精的話反而可以到比較大嘅百貨公司，基本上都有穩定地返貨。
2 潛伏期到底幾耐？（6683筆）
隨著國際對疫情嘅掌控同了解越多，病情嘅潛伏期以致發病病症都各有說法。以病毒潛伏期來講，有人感染後最短一日發病，之前各國都以14日作為自我隔離嘅標準，然而係月初由鍾南山院士率領嘅團隊發表預印研究報告，裡面則提到當時1099個病例裡面，其中一例嘅患者病毒潛伏期有到24日，其後有零星嘅案例更長達27日。為免傳媒同民眾過度解讀呢個極端嘅數字，鍾南山特別補充，要科學地正視數據，而目前疫情嘅絕大多數病人潛伏期係2-7日，取中位數則係4日。研究報告裡面亦證實人傳人嘅傳染模式，所以最佳依然係做好自我隔離，避免交叉感染。
1 幾時先會有疫苗？（7775筆）
武漢肺炎具高傳染性，加上爆發之初管控慢咗，一下子互相傳染嘅人數爆發。中國喺一月公布咗新冠病毒嘅基因序列後，各國都同時間競賽咁設計新疫苗。但係疫苗研發出來到批量生產，並唔係短期任務咁簡單，當中要經過動物測試、人體臨床試驗、大規模人群驗證、世衛組織嘅許可到本國許可等繁複程序。中國目前有5條技術路線同時研發疫苗，而一月底嘅時候，由沙士專家袁國勇率領港大微生物學系團隊，喺噴鼻式流感疫苗嘅基礎上，研究緊加入呢個新冠病毒元素，等未來進行動物測試時就知道可唔可以預防流感嘅同時，預防埋呢個新型冠狀病毒。
網路溫度計香港版嘅Telegram開咗喇！快D嚟follow我哋啦→https://t.me/dailyviewhk
【香港網路溫度計調查結果之圖文，未經授權請勿轉載、改寫】
分析說明：
本研究資料由《KEYPO大數據關鍵引擎》提供，分析時間範圍為2020年01月01日至2020年02月24日。
網路大數據系統觀測港澳地區上萬個網站頻道，包括新聞頻道、Facebook、Instagram及各大討論區、BLOG等，針對討論『網民討論武漢肺炎的十大問題』相關文本進行分析，並根據網友就該議題之討論，作為本分析依據。
本文分析之結果，非參考投票、民調、網路問卷等資料，名次僅代表網路討論熱度大小，不代表網友正負評價。
.Bu 我搜尋武漢肺炎病徵
點解唔上榜😱
2020年02月26日02:49
顯示全部