識飲識食
廣告（請繼續閱讀本文）
前日行街市買餸時都只係打算懶懶地滾個冬瓜湯，咁就可以又有湯飲之餘又可以當一個簡單餸嚟食。
但後來發現原來係小暑，菜檔姨姨就溫馨提示要煲返個咁消暑茶，所以最後我就改左煲依個消暑袪濕嘅荷葉冬瓜水，等我家兩位老細消消暑啦~
廣告（請繼續閱讀本文）
冬瓜有清熱、除煩止渴、利尿消腫、除痰、袪濕等多種功效；乾荷葉有助降血壓、解暑清心、防暑降溫及消退水腫；赤小豆有滋陰補腎、利水除濕、和血排膿及消腫解毒；扁豆有助祛濕健脾胃；薏米有清熱祛濕、健脾胃、利小便、去水腫、寧神安眠等作用；眉豆則補脾和中，化濕消暑，含豐富磷質，可增強記憶力，及延緩腦功能衰退；蜜棗止咳潤肺、化痰平喘功效。(網上資料)
冬瓜1斤、乾荷葉半塊、赤小豆1両、扁豆1両、生薏米1両、眉豆1両及蜜棗2粒~
廣告（請繼續閱讀本文）
冬瓜乾淨切件，要連埋冬瓜皮、瓜瓤和瓜籽一齊煲~
所有豆豆及蜜棗浸洗備用~
荷葉洗乾淨之後剪開備用~
煲內放約2L水，待水滾後加入所有材料(荷葉除外)~
待起後，繼續用大火加蓋煲約15分鐘~
然後轉慢火加蓋煲多30分鐘~
最後放入荷葉後再用大火煲多10分鐘~
煲好之後待涼入樽，雪凍之後仲好飲呀~
飲落好重冬瓜味，但又唔會有嗰一陣藥材味，所以小小豬都好肯飲，仲唔洗我提就好快飲晒一大杯啦！
係依個炎炎夏天煲多啲荷葉冬瓜茶嚟飲，消消暑都唔錯呀！
溫馨提示：
- 嚟緊7月23日就係大暑，可以考慮試下煲依個冬瓜水嚟消暑啦！
- 藥材依方面都係好因應個人體質，所以記得煲之前了解下自己，或者問下相熟藥材店職員，依個藥方啱唔啱飲呀！
*本文章的內容若未經授權，不得轉載