【William哭了】陳偉霆不捨周揚青　飯局Mood到即落淚

內地火紅嘅藝人陳偉霆（William）主理嘅內地真人騷《潮流合夥人2》，近日正式嚟到尾聲，佢同大陸網紅周揚青、歐陽娜娜、范丞丞、劉雨昕5人攜手經營潮流集合店，仲一齊住足廿幾天，感情慢慢建立，最後一集就播出眾人食「最後晚餐」，當中情感大爆發嘅William更當場落淚，真情流露。

節目組安排5人食最後晚餐，然後逐一離去，William同眾人一早就變晒好朋友，William同大家分別到一半忽然Mood到，眼淚仲開始湧上眼眶，不過有偶像包袱嘅佢，為保形象都堅持戴上黑超，Chok住喊真係唔容易。不過原來其他4人未真係離開住，而係返宿舍布置生日P，當William返到去時真係夠晒驚喜，好在今次佢就冇再喊，同大家一齊開開心心咁切Cake。

節目出街後，網友都大讚William有情義，對住一班細佢咁多嘅藝人真係似足大哥哥，對眾人照顧有加，估唔到拍個節目都搵到知心好友，抵佢圈中人面咁廣呀！

東網網站 : https://on.cc/

東網Facebook專頁 : https://www.facebook.com/onccnews/