連大廈都多元化？！Chill歎墨西哥式bar & restaurant～集酒店、餐廳、共用工作室、GYM房於一身～

香港係個文化多元嘅地方，所以進化到連一棟大廈都變到好多元！呢一棟位於上環嘅大廈可以話要乜有乜，餐廳、Bar、酒店、共享住宿、共用工作室、GYM都集中喺呢度，等小編帶大家睇下有幾chill啦！

一嚟到呢度就好易認到呢間酒店，因為附近都係比較有歷史嘅建築物，而酒店就裝修得好有特色，而且富現代感！

酒店第一、二層係Bar & Restaurant，裝修好有特色，仲有霓虹裝置好啱打卡！
賣好有特色嘅墨西哥菜同特色調酒！而且有對街景嘅open area，可以打下卡、chill下～

呢度嘅墨西哥菜，無論材料配搭定擺碟都好有自己特色，而且由來自墨⻄哥瓜達拉哈拉嘅大廚 José Alfonso Rodríguez 主理！
講到墨西哥菜，一定會諗起墨西哥脆餅！呢度嘅墨西哥脆餅係佢地自家製嘅，仲有幾隻顏色，好吸引～而配墨西哥脆餅一齊食嘅牛油果醬都好有心思，上面會撒上烤焦嘅洋蔥粉，增加香味同甜味!
經典牛油果醬配自家製墨西哥脆餅（Guacamole）$88

另一度推薦嘅墨西哥菜真係好值得試！
嫩滑嘅吞拿魚配酸酸甜甜嘅醬好開胃，再配埋帶微辛嘅配菜，好夾！
一啖一塊，好啱嘴形～
醃吞拿魚墨西哥脆餅配番石榴甜酸醬及菠蘿醬(Tuna Al Pastor Upside-Down Tostada) $65

有佳餚當然要有美酒配埋啦！
呢度獨有嘅cocktail好有特色，歎翻杯chill下係一大視覺、味覺嘅享受！
想飲杯夢幻cocktail？就要試下呢杯喇！
佢用有墨西哥造景嘅玻璃箱上枱，入面充滿燃點玉桂嘅煙，係一杯經煙熏嘅cocktail嚟！
飲落每啖都好香煙熏嘅味道，好適合口味比較濃嘅男士～
Maya Civilization $90

如喜歡水果味、清新啲嘅cocktail，就可以揀以下呢杯！
呢杯cocktail以西柚為主調，飲完有種好refreshing嘅感覺！
Las Palomas Coloradas $118

一餐豐富嘅飯當然要由甜品嚟劃上句號啦！
呢度嘅墨西哥甜品都好特別，又睇得又有新鮮感！
石榴荔枝三奶蛋糕（Deconstructed 3 Leches）$65

呢度除左係餐廳之外，仲暗藏玄機！
其實呢棟大廈係酒店嚟嘅，有share room、套房、共用工作室、Gym房，可以話滿足哂住客嘅願望！

啲套房好舒服，裝修簡約得嚟又有藝術氣息！
洗手間同浴室設備好齊全；房入面有好多細心嘅設施，好似電動窗簾、床頭掛USB嘅位置、可以自由調較角度嘅床頭射燈⋯⋯

套房有分大中細嘅尺寸，全部都係好寬敞，而且大部份都係大床，好正嫁！
細房$1350起，加10%服務費；中房$1450起，加10%服務費；大房$1600起，加10%服務費；特大房$1950，加10%服務費～
而share room就每日$500起，加10%服務費～

呢個聖誕未諗好去邊旅行，不妨嚟呢度chill住過聖誕啦!

《Mojo Nomad Central》
地址：中環皇后大道中 286 號
電話：+852 3423 3290
電郵：tqm@mojonomad.com

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）

歡迎關注我們的 Facebook 與 Instagram