E Cup Baby劉欣宜轉做空姐七年 發文控訴無理解僱

曾經在𡃁模界叱吒一時的E Cup Baby劉欣宜，當年憑34E上圍吸納無數宅男粉絲，後來𡃁模沒落她亦收山，13年退出娛樂圈轉型做空中服務員，可惜過去一年因疫情關係航空業大受影響，繼早前港龍航空結業，香港航空亦宣布裁走250名機組人員。收到大信封的E Cup Baby不忿被裁，在社交網出post大控訴，表示自己盡忠職守七年最後得到這個結果，感到非常之失望。

撰文：東方新地 圖片：劉欣宜IG

E Cup Baby再現江湖

𡃁模出身的E Cup Baby劉欣宜，近年在娛樂圈消聲匿跡，原來已轉投空中服務員工作，她由普通艙服務員做起，任職七年已進升成為Purser（座艙長）級別，可惜一場疫情令她加入失業大軍。香港航空宣布要裁員250人，E Cup Baby亦收到大信封，她在社交網發文，表示已收到公司解僱信，令她感到突然兼不是味兒……她指自己做過幾年best cabin crew（最佳乘務員）、由FA（空中服務員）做到purser。從來無過錯，只有功勞，而且她幫公司執過屎、執過舊機、捱過困獸鬥又入team，Outport陪crew入醫院都唔只一次。

E Cup Baby攞獎無數都要被裁

睇到這裡已經知道E Cup Baby效力的一肚苦水，對於自己被解僱表示極度不忿，她自問七年來盡忠職守，而收大信封前一晚剛落機，為此她表示其實完全冇諗過會係自己，主要係失望同唔捨得。雖然感到失望，但E Cup Baby仍感謝一直以來與她飛過的同事同朋友：「令我每班機都好開心、好難忘。留低嘅要繼續努力。不過再一次證明原來炒人真係同performance（表現）無關。咁……我啲獎算係乜？」

E Cup Baby洗盡鉛華

突然失業的E Cup Baby已經31 歲，她於16年下嫁音樂人陳子敏，前年誕下一女，2歲半的囡囡活潑可愛，E Cup Baby不時在社交網上載生活照，一家三口生活得幸福快樂，E Cup Baby更煮得一手好菜，唔做空姐大不了做個全職媽媽。