JW開騷講女生心事　網上拉票盼穿宮廷裝扮皇后

歌手JW（王灝兒）昨日到九龍灣開記者會，宣布將於11月舉行MOOV LIVE演唱會。由《矛盾一生》開始，JW可謂唱盡女生心事，更被喻為「女生代言人」，今次的演出她就以此為主題，分享自己的愛情經歷：「特別希望同fans多啲互動，真係傾吓偈、講女生心事。」被問到會否令男樂迷覺得悶，她笑言男生更要睇，可了解女生多一點當「溝女攻略」。

為應付演唱會，一向有做開gym的JW話都要加緊訓練：「本身一個星期大概操2至3次，依家3次真係基本。另外仲要忍口，食少啲零食。」今次演出除了JW要準備，樂迷同樣有功課，事關大會安排了投票活動，大家可以在貴氣宮廷、日系動漫、可愛動物及狂野搖滾中選出JW演出時的理想造型。近排狂追《延禧攻略》的JW自言貴氣宮廷是心水：「我好鍾意明玉！但要做就梗係做皇后，衫夠靚吖嘛！」她又表示自己其實有皇族血統，翻查族譜後知道是愛新覺羅正白旗人，所以特別適合宮廷裝。