呢個世界都係鍾意睇人哋點樣衰，就算唔關自己事，都會講埋一份。但呢種心理放咗喺投資決定上邊，就好容易跌入陷阱，將好嘅睇成為衰，小則錯過投資機會，大則要損手離場。好似上星期五啱啱公布業績嘅新世界，之前就好多人話佢蝕咗好多錢，仲攞嚟同內房股比較，咁究竟佢業績係咪真係咁差呢？定還是而家股價好有反彈嘅可能？
好似早幾日同添馬艦嘅老友記喺金鐘中信大廈海都飲茶，一面食住佢哋精美嘅點心，一面就同啲達官貴人解釋地產市道嘅走向。地產股其實只係同大市一齊同步股價下跌，如果要比不同嘅板塊，地產股板塊並唔係最落魄嘅。而喺咁多隻股當中，最多人講嘅就係新世界蝕錢。
但係睇返佢哋嘅業績報告，蝕錢主要係嚟自一次性嘅虧損，同埋帳面物業重估，咁呢兩個原因又係咪最致命呢？首先講吓點解會有一次性嘅虧損，因為新世界舊年出售咗新創建六成嘅股份，所以帳面錄得虧損83億，喺會計上只係需要喺今年嘅財務報告裏面一次性反映，並唔係結構問題。
而物業資產普遍有下跌，新世界就主動做資產重估，等喺個會計帳目上邊合理反映返而家嘅市況，咁即係話呢啲虧損只係帳面嘅上上落落，只要使到有改變物業價值即刻同步提升。而且資產重估都係一次性嘅，下年係點真係冇人知。
睇落去更重要嘅係，新世界好積極咁出售物業，等佢哋嘅現金流冇受到咩壓力。好似佢哋喺啟德海邊嘅住宅項目「柏蔚森」，就買咗七成幾單位，套現21億。對於非核心業務，好似荃灣嘅愉景新城商場同停車場，就套現咗40億。所以新世界可以喺海外銀行貸款啲超低利息嘅貸款，平均利率只係香港同業銀行拆息加1.1厘。今年唔單止還咗500億，有啲仲係2025年先到期嘅提早還款。
簡單嚟講，地產行業重置，資產價值調整有利左收窄估值折讓，新世界只係快啲準備成個行業要大洗牌，早啲做定估值嘅準備。而美國加息周期已經完咗，仲好有可能九月就減息，對於之前一直挨貴利息嘅地產股係絕大嘅喜訊。所以投資者千祈唔好聽到啲咩負面嘅資訊就信晒，睇深入啲資料隨時能夠尋寶。
曹參國
註：專欄作家言論不代表本網立場
密切留意BossMind動向！立即CLS