對大部分人來說，過去三年長得很，社會紛爭持續、疫情看不見盡頭，無法想像和計劃將來，「活在當下」便成為了大家常掛在口邊的話。演出機會減少，本地音樂圈子迎來了創作力最旺盛的階段，而「Indie Pop」樂隊 The Hertz，發表了廣受好評的 EP《The Hertz》後，打從 2021 年初的〈千世書〉起，更是以大概一季一曲的密度，為新專輯鋪路，至今已發佈超過 10 首歌曲。這張名為《Present》的新作，將於 4 月 23 日推出，同日還會在旺角麥花臣場館舉行音樂會，呼應專輯的「當下」主題。
3 年時間炮製 14 首歌的大碟
《Present》是如假包換的「真．大碟」，不是 7、8 首歌的「mini album」，合共收錄多達 14 首作品，訪問 The Hertz 不久獲得這項資訊時，老實說真有點驚喜（和驚訝）。樂隊主音兼最主要的「發言人」Herman 表示，既然做了一張 EP，就「不如試吓啲唔同嘅嘢啦」：「有時我哋聽外國嘢，譬如 The Weeknd 咁，佢一出碟就廿隻歌，點解香港唔得？」做著做著，便弄了 14 首歌出來。
截至本文出街之時，大家應該已聽到 10 首（不包括〈Lay on My Shoulder〉），還有 4 首未正式出街，和近年樂壇出碟之時已再無新歌可聽的慣性（okay，有時可能尚剩一首），相比之下，實在誠意十足。
問他們中途可有想過快快手出多張 EP，鍵琴手 Him 也答「好容易產生呢個念頭」。然而「Present」這個主題確實宏大，「好多嘢可以講到，就覺得唔好局限，繼續做落去」。是的，「Present」這個主題不是臨出碟才堆砌出來的，而是做〈千世書〉之前已經定下，低音結他手 Ray 還透露，當時寫了一張「mind map」，記低概念，以及每首歌想怎樣做。當然，那時他們沒有想過要做 14 首歌那麼多。
期間他們跟幾位填詞人合作，包括 Serrini、Oscar、小克、何秀萍等，對方都有收到「Present」這個 keyword。樂隊的填詞主力 Him 說一班客席填詞人都有明確指引：「唔係我話想寫呢樣嘢，你幫我寫啦咁，更不是純粹因為想同邊個填詞人合作，而是想知道佢哋對 Present 嘅睇法。」
「好多人講活在當下，但意思好含糊」
如今重溫〈妖〉或是〈Now Here, Man!〉，更能發現詞人如何注入自己的想法到「Present」這個主題之中，譬如前者猶如 Serrini〈繼續玩〉的另一個變奏，後者則把 The Beatles 的名作從空間地域的角度，演繹成以時間作為維度，表達「活在當下」才真正自由的道理。
找來叉姐何秀萍合作可謂特別驚喜，Herman 也表示「呢個級數本來唔夠膽亂搵」，但看到她為野佬（Yellow!）寫了一首〈有誰露營〉，「覺得佢好似出返山」，便嘗試聯絡一下。「當大家對佢嘅印象仲停留喺以前達明一派時期，如果搵佢講呢一刻嘅香港、社會，其實好 present。」
鼓手 Marco 承認，專輯的構思多少會受社會環境影響：「大家都喺香港經歷過唔同嘅事，於是突然就有個諗法，大家好似對過去同未來都好執著，但對於而家嘅自己就好似唔係好善待，其實每一刻都好影響個未來，the future is now！」Him 再補充：「好多人講活在當下，但意思好含糊，我哋就諗：可唔可以深入講吓係乜嘢嚟？」
Herman 拋出思考題，以他早前考慮辭去正職投入樂隊工作為例：「如果我即刻辭職，係咪就叫活在當下？」沒有絕對的答案，一切就留待讀者（聽完成隻碟後）去想想吧，「Present」其實也是以「活在當下」的精神給樂迷的「禮物」。
「玩甚麼類型都好，要留到自己祲馟」
訪問期間不難發現，樂隊成員之間的感情十分好，他們也表示彼此之間絕少鬧交，因為「咩都攞出嚟講」，背後只有「理性討論」。Ray 說以往夾 band「好似返工」，和團員「做唔到 friend」，但現在 The Hertz 是會一起食飯、行山、打吓 FIFA 的團隊，並指尤其「食飯真係好重要」，飯桌從來都是最好的交流平台。
說到這幾年樂隊最大的改變，也只有「越來越 smooth」。當然也是越來越紅，但 Him 笑言「搭巴士仲係好安全」。Herman 表示這幾年對音樂或這個行業都有更多了解和更清晰的想法，「愈來愈清楚個玩法，反而愈來愈唔計算。愈知得多，你就愈清楚呢個遊戲無得玩，就更加珍惜而家呢種純粹嘅創作。」
所以他們以 Indie Pop 形容樂隊的創作，有流行的樂韻，卻又完全自主，不受大公司束縛，意念 5 個人一致通過就能成事。他們也指這個 genre 勝在好無敵，結他手 Ricky 說「最初唔知呢個係一個 genre」，但更重要是玩甚麼類型都好，「要留到自己祲馟（音：浸除）」，就如他們為別人創作的〈MM7〉（柳應廷）和〈痴漢之歌〉（劇集《季前賽》插曲），一聽就知是「Hertz Pop」。Pop 唔 Pop 也只是一個標籤，Herman 說很多本地爵士大師都話自己玩 Pop，「對佢哋嚟講係一種謙虛嚟」。《Present》的路向則以跟內容搭配為宗旨，Him 舉例〈末世情書〉不是沒有想過 funky 或編得奇怪一點，但「聽出嚟係唔啱」，於是才有現在加入 strings 的版本。
「活在當下」，The Hertz 說樂隊沒有甚麼遠大目標，但接著也有 tour，並正洽談一些音樂節的演出，「活在當下唔係連下個月嘅嘢都唔諗呀」。當然，否則樂隊又點會有碟出、有 show 演？「Present」的意思就看你怎麼詮釋。
按此了解更多 Overflow 音樂資訊
同埋 Follow 我哋社交平台：
Facebook：@overflowhk
Instagram：@musicoverflowhk