呢幾日不斷被四徑洗版，唔爭在，今期介紹嘅「火車站」跑會，創辦人兼教練正是2022年四徑完成者 – Thomas Lam 林成業 (火車 Sir)。
成立10年嘅「火車站」，除恆常跑班外還有長跑班、體能班、瑜伽班及越野跑班，分會遍佈港九新界，不少跑友冒名而至，門生數以百計，絕對係本地跑壇嘅中流砥柱之一。
一直以為，要成為全職高階跑手，全天候保持天花板狀態是必需，以往所接觸過嘅眾多高階跑手們，無不將生活全情投入跑魂中，自身操練加上每週頻繁教班，生活幾近全方位被跑步所覆蓋。好奇想知，跑步以外佢哋還有甚麼可做，為此，Peter 總喜歡八卦佢哋還有否其它喜好。
火車 Sir 一向予人感覺謙遜有禮、不慍不火，有別大部份高階跑手，沒過多硬朗熱血，卻多一份溫文爾雅嘅文人氣質。訪談下方知道火車 Sir 跑步以外更喜觀唱歌，拍攝當日更即興邊跑邊唱。此外更是一名舞台劇發燒友，發燒程度已非單單作為觀眾所能滿足，本身為舞台劇演員，有屬於自己嘅劇團，更常有官方劇目公開演出，書卷氣質源於此，難怪 !
比起如何練成 sub 3 甚至四徑完成者，能做到如火車 Sir 般完美演繹 Work Life balance 進階版 – Run Life balance 更值得深思與學習，跑步並不是一切。
嚟到「火車站」更能確切體會呢份 Run Life balance 嘅特質。不難想像，四徑完成者嘅跑班點會輕鬆 ?! 拍攝當晚縱觀所有學員於場內無不全力以赴跑至往生，停下來於場邊卻面帶笑容流露滿足之情，無人會跟你呻幾攰幾辛苦，只會同你講呢度有幾開心幾愉快。收工嚟到還以為百上加斤，反之卻助你驅散一日之倦苔，這是一種 balance；以為從旁「監察」嘅火車 Sir 如大部份魔鬼教練般叫你頂埋佢食晒佢 ? 反之勸你抖抖飲啖水，繼而乘機搲水吹，東一句西一句，閒話日常，魔鬼天使之混種，這也是一種 balance。
過去一年多，自訂目標明確，矢志成為 sub 3 跑手，練習課表以至生活習慣均言聽計從，interval、tempo、LSD、通勤跑收工跑放假跑，但結果仍差一點點，沒有不甘卻總覺哪裡不足。直至嚟到「火車站」，醒覺就是一直欠缺呢份 Run Life balance，跑步可以是生活，是態度甚至是人生，但肯定不會是全部，任憑目標再宏大也必需連繫生活上眾多大小元素所建構而成。沒有生活沒有感受，僅有跑步的話，跟冰冷而無思想嘅跑步機有何分別 ? 全速前進跟胡亂莽撞終究是兩碼子事。
強大嘅火車 Sir 以跑步、音樂、舞台劇 (可能還有更多) 建構出自己嘅 Run Life balance，渺少如我，卻仍在跌跌碰碰中尋找屬於自己嘅平衡。
The post 尋找跑會的故事 #33 | 火車站．跑步…..其實不只跑步 appeared first on Fitz 運動平台.