3年1度嘅社工註冊局今日(4日)進行改選，15名候選人競逐8個席位，其中包括前學民思潮成員、前香港眾志副主席黎汶洛嘅7人團隊，全部當選。
社工註冊局選舉有6521人投票，投票率為24.3%。7人團隊成員包括黎汶洛、 伍銳明、鍾威麟、何詩敏、黃錦娟、陸鳳萍同林昭寰，至於第8位當選者係陳國邦。佢哋當選後喺社交平台貼文，話喺現時嘅社會氛圍下，仍有逾6000社工投票，反映社工界投入參與。佢哋喺明年初正式加入註冊局後會按註冊規例，執行註冊局嘅工作，又話樂意主動同所有當選嘅民選成員同埋註冊局嘅委任成員合作商討。
廣告（請繼續閱讀本文）
2016年學民思潮宣布停止運作後，前召集人黃之鋒話會同部分成員組織新政黨，即係舊年已解散嘅香港眾志。而曾出任學民思潮發言人嘅黎汶洛有意競逐立法會九龍東地區直選，但佢喺提名期前宣布因資源不足棄選。棄選後，佢喺政圈頗為沉寂，直至2018年5月退出眾志，其後出戰社工註冊局選舉，但最終落選。
東網網站 : https://on.cc/東網Facebook專頁 : https://www.facebook.com/onccnews/