無綫台慶劇《新聞女王》昨晚（23日）一集峰迴路轉，爭贏成為「仁心」King Maker的Man姐（佘詩曼飾），因被拍下與葉晨（陳敏之飾）「造假」罪證、遭梁景仁（佐治，馬國明飾）乘虛而入，奪去總主播主任一職。Man姐即時以假辭職還擊，並著文家軍玩「曠工」。
出賣Man姐的竟是其頭號愛將曉薇（何依婷飾），曉薇與梁景仁更大搞辦公室「地下情」，依婷因第3集一場「反枱戲」演技受到批評，但隨著被揭出是二五女的曉薇「機心樣」曝光，對著梁景仁與Man姐又有不同程度的順從及溫柔，其中一句向景仁撒嬌對白：「你惡呀」，更像極真女友撒嬌。
談到曉薇不但能力值低，更「食碗面、反碗底」，何依婷受訪時坦言角色輸蝕：「因為其他人都好叻，但得一個曉薇係咁輸，然後又反骨做二五仔，畀人感覺好壞咁。」
她表示由於角色有躁鬱症，拍攝期間心情低落足足數個月。作為曉薇真身，依婷亦為角色平反：「睇完咁多集劇本，我覺得曉薇都有值得同情地方，希望大家睇落去會見到佢成長，佢輸到咁上下係會覺醒。其實曉薇都好慘，Man姐雖然對佢好好，但成日情緒勒索佢，永遠要活喺對方陰影之下；自己男友又唔係真心真意、最愛竟然係前度，所以曉薇最後會學識凡事要為自己。」何依婷更預告曉薇之後會遇到更多「震撼」事件，並謂相關場口比拍攝反枱戲更為難忘。
至於曉薇男友梁景仁，除了角色陰險多次計算Man姐，他將曉薇及Cathy（高海寧飾）同時玩弄鼓掌之間、對前度念念不忘並私下約會對方在內地亦引來「海王」（渣男）封號，更有網民懷疑他一腳踏三船！
與馬明相反，劇中另一男主角車房佬阿傑（譚俊彥飾），雖然出場次數不多，但每次均擔當Man姐心靈雞湯角色，加上性格正直，瞬間成為劇中第3位最討好角色。昨晚阿傑眼見Man姐玩辭職玩得任性又過火，除苦口婆心：「你都係畀心機做好新聞，唔好剩係掛住鬥」，並以「呢個世界冇嘢係唔換得」提醒Man姐不要自視過高，說時眼神充滿溺愛，獲大讚「極級暖男」。
（即時娛樂）